Canadami uuliasiortut unitsinneqartut

Kangertugaapimmi innuttaasut nunaqarfimmi eqqaata imartaani immap naqqani sajuppillatsitsisarluni misissuinerit, nipitoorujussuarmik immamut nipiliorluni misissuinissat, unitsikkusuppaat.

Kangertugaapik - Clyde River - nunaqarfiuvoq Qeqertaluup kangianiittoq Ikersuaq Davisip sinaaniippoq Kalaallit Nunaata tungaanut sammilluni. Uummannaap Upernaviullu akornata nalaaniilluni. Tassanilu innuttaasut kamapput.

Nukissiorfiit naalagaaffinni amerlasuuniittut pingasut Ikersuaq Davisimi nunaqarfiup eqqaani immap naqqani sajuppillatsitsisarluni misissuinissaminnik akuerisaasimapput. Suliffeqarfiit pingasut taakku Canadami nukissiuutinut aqutsisoqarfimmit avannaanullu tunngasunut ministerimit, Bernard Valcourtimit, akuersissummik "exploration certificate"mik taaneqartumik, tassa piiaasinnaanermik akuersissut, tunineqarsimapput uuliaqarsinnaanera pillugu.

Immap naqqani sajuppillatsitsisarluni misissuinerit juulip 22ani aallartittussaagaluarput.

Nunaqarfiulli innuttaasa tamanna akueriumasimanngilaat.

Tusarniaasut suliassartik suliarisimanngilaat
Cathy Towtongie, Nunavut Tunngavikmi presidenti, Nunavumi nunamut piginnittussaanermut tunngasunik aqutsisoq, Radioaviisimut oqarpoq Canadami nukissiuutinut aqutsisoqarfik, tusarniaanermik aqutsisuusoq, suliassartik iluamik suliarisimanngikkaat.

Tuaviinnaq tikikkamik inunnik oqaloqatiginnipallariarlutik aallaqqipallassimapput.

- Taama qarsupitsigisumik oqaloqatiginninneq naammanngilaq, Cathy Towtongie oqarpoq, iluameersunik paasissutissanik peqqaarluta iluameersumik suliamut akuersisinnaavugut, taamaattoqarsimanngilarlu!

Tamanna pillugu Nunavut Tunngavik Canadami naalakkersuisunut maalaaruteqarpoq maannalu akinissaminnut ukiumik ataatsimik periarfissinneqaqqissimallutik. Taamaammat misissuinerit ukioq manna ingerlanneqassanngillat.

Misissuinerit uumasunut sunniinerlussinnaapput
Cathy Towtongiep ilanngullugu Radioaviisimut nassuiaatigaa nipit nipitoorujussuit atorlugit misissuisoqassappat tamanna arfernut, puisinut qilalukkanullu tamaaniittunut kingunipiloqassammat immap naqqani sajuppillatsitsisarluni misissuinissamut qularnertik tunngaveqartoq. Taamaattoqassappammi naggueqatigiit Inuit inuuniarnerannut ajorluinnartumik sunniuteqarsinnaammat.

Immap naqqani sajuppillatsitsisarluni misissuinerit qaqugumulluunniit unitsinneqarnissaat siunertaralugu Nunavut Tunngavimmit naalakkersuisut eqqartuussivimmut suliassanngortinniarneqarput.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl