ICC: - Naggueqatigiit Inuit visumeqaratik angalasinnaasariaqarput
Nuummi septemberimi Inuit Circumpolar Council (ICC) ataatsimiinneranni naggueqatigiit Inuit suliniaqatigiiffiata allannguutissatut siunnersuutigisaanni ersarinnerpaaq tassaagunarpoq killeqarfiit akimorlugit visumeqarani angalasinnaanissaq.
- Visumeqarani qaqugumulluunniit nunat killeqarfigisaat apeqqutaatinnagit naggueqatigiit Inuit imartaminnut nunaminnullu atuisinnaanissaat siunnersuutigineqarpoq, Sara Olsvig ICC-mi siulittaasoq oqarpoq.
Canadap Kalaallit Nunaatalu akornanni Pikialasorsuarmik aqutsiveqarfimmik ataatsimoorussamik pilersitsinissaq 2017-imi isumalioqatigiissitap kaammaattuutaannik tunngaveqarpoq.
Pikialasorsuaq pillugu isumalioqatigiissitap 2017-imi kaammattuutigisai pingasuusut nunani naalakkersuisunit atuuttunngortinneqarnissaat ICC-ip anguniarpaa. Nuummi ataatsimiinnerup kingorna Canadami Kalaallit Nunaannilu naalakkersuisunut Pikialasorsuup aqutsiveqarfittut pilersinneqarnissaanut kaammattuutit 21-it nassiunneqarput.
- Naalakkersuisunut kaammattuutit piviusunngortinneqarnissaat pillugit Canadami Kalaallit Nunaannilu naalakkersuisut suleqatigaagut. Canadami Kalaallit Nunaannilu naalakkersuisut suliap ingerlaqqinnissaa suliaraat ICC-miillu suliami ingerlariaqqippugut 2017-imi ICC-mit kaammattuutit piviusunngortinnissaat pillugit Sara Olsvig oqarpoq.
Nunat inoqqaavisa pisinnaatitaaffiisa pituttuisunut nikikkiartuaarnerat
Kaammattuutigineqartulli piviusunngorsinnaanerat qaqugu pisinnaassanersoq nalunarpoq. Sara Olsvig oqarpoq.
- Una suliaq ukiuni qulini ingerlareersimalerpoq ilimagineqarsinnaavorlu suli sivisunerulersinnaasoq. Nunani tamalaani suliat piffissamik sivisuumik ingerlanneqartarput ingammillu eqqarsaatigigaanni nunat killeqarfii pineqartillugit.
2014-miilli Kalaallit Nunaanni innuttaasut marlunnik innuttaassuseqarsinnaapput USA-mi Canadamilu periarfissaq tamanna aamma atuuppoq.
Naalagaaffiit Peqatigiit nunat inoqqaavisa pisinnaatitaffii pillugit nalunaarutaa-naak naalagaaffinnut pituttuinngikkaluarluni - naalagaaffinnut nunat inoqqaavisa pisinnaatitaaffiisa qulakkeernissaannut tikkuussisuuvoq.
Naalagaaffiit Peqatigiit ataatsimeersuarnerannit aalajangersakkat pituttuisutut inissisimanngikkaluartut nunani allani aamma nunat inoqqaavisa naalagaaffimmik pisinnaatitaaffiit pillugit isumaqatiginniartarneranni pisinnaatitaaffiit allanngortarnerat takornartaanngillat.