Naggueqatigiit Inuit inuusuttaat ataatsimeersuarput
Naggueqatigiit Inuit inuusuttaasa siunnersuisoqatigiiffiat The National Inuit Youth Council ukioq manna ukiunik qulinngortorsiorpoq, iliuusissatullu pilersaarutit siunissamilu pingaarnertut anguniagassat ataatsimeersuarnermi eqqartorneqarput.
Inuusuttut siunnersuisoqatigiivisa præsidentertaavata Maatalii Okaliup CBC Newsimut oqaatigaa naggueqatigiit Inuit oqaasii kulturiallu nukittorsarneqarnissaat sulissutiginiarlugu.
Oqaatsit kulturilu oqaluuserineqartussatut ataatsimeersuarnermi pingaartinneqarput, imminulli toquttarneq, peqqissuseq ilinniartitaanerlu inuusuttut ataatsimeersuarnerminni aamma eqqartorpaat.
Maatalii Okalik ilanngullugu oqarpoq pingaaruteqartoq inuusuttut nunap immikkoortuini sisamaneersut, tassalu kitaani Inuialuit, Nunatsiavut, Nunavik aamma Nunavut suleqatigiinneq ilikkartariaqaraat. Naak nunap immikkoortuini sisamani assigiinngissuteqartoqaraluartoq, tamarmik naggueqatigiiupput Inuit ataatsimut anguniagaqartut, inuusuttut præsidentitaavat qinigaarlaaq taama oqarpoq.
Ulluni tallimani Iqalunni ataatsimiinneq, ataasinngornermi pinngortitami pisuttuaqatigiinnermik naggaserneqarpoq.
