Kitsissuarsummiu Lars Peter Mølgaard COP27-mi oqalugiartoq
Nunarsuarmioqatigut silap allanngoriartornera pillugu Naalagaaffiit Peqatigiit COP27-mik taallugu aaqqissugaannik Egyptenimi Sharm el Sheikimi ulluni makkunani ataatsimeersuarput.
Inuit Issittormiut Siunnersuisoqatigiiffiat, ICC, aamma peqataavoq. Naggueqatigiimmi inuit silap allanngoriartorneranut tunngasuni politikkikkut iliuusissanik aalajangiiniarnerni peqataatinneqarluinnarnissaat pingaartuusoq, ICC-p erseqqissaatigerusuppaa.
ICC-p præsidentia, Sara Olsvig, aamma ataatsimeersuaqataavoq.
- Inuit nunallu inoqqaavi allat ilisimasanik naleqarluinnartunik peqarput politikkikkullu iliuusissanik aalajangiiniarnerni tamani peqataasariaqarpugut, taanna oqarpoq.
Taassumalu oqariartuutaa erseqqippoq: Naalagaaffiit naggueqatigiit inuit qulaatiinnarlugit aalajangersaasassanngillat.
Kuupik Kleist ICC-p nunatsinni immikkoortortaqarfiani siulittaasuuvoq. ICC-p sorsuutiginiagai suunersut taassuma ataatsimeersuarnermi nassuiarpai:
- Oqaluuserisassatut innersuussutivut tallimaapput. Taakkua ilaatigut naggueqatigiit inuit peqataatinneqarnerusariaqarnerannut, Issittumi sila allanngoriartupiloorneranut taavalu naggueqatigiit inuit ilisimasaat misilittagaallu aallaavigalugit aalajangiisoqartalernissaannut tunngapput, Kuupik Kleist KNR-imut oqarpoq.
Kitsissuarsummiu Lars Peter Mølgaard aamma ataatsimeersuaqataasoq
Ataatsimeersuaqataasuni naggueqatigiit inunneersut nunatsinneersuuinnaratik aamma nunanit naggueqatigiit inoqarfiusuneersortaqarput. Naggueqatigiit inuit puigorneqanngilluinnarnissaat qulakkeerniarlugu, taakku COP27-mi ataatsimeersuaqataapput.
- Nunarsuarmioqataanerput siullermik erseqqissassavarput. Uagut naggueqatigiit inuusugut issittormiuuvugut, aalajangiinernilu qulaatiinnarneqartussaanngilagut. Ataatsimeersuarnerlu tamatuminnga anngussivissaqqeqaaq, Kuupik Kleist oqarpoq.
Lars Peter Mølgaard aamma Sara Olsvig. Assi: ICC
ICC saamillu siunnersuisuoqativigiivi Naalagaaffiit Peqatigiit COP27-mik taallugu silap allanngoriartornera pillugu ataatsimeersuartitsineranni oqallitsimmata, KNAPK-meersoq Lars Peter Mølgaard aamma peqataavoq. Taanna Kitsissuarsummiuuvoq.
- Aalisartutut piniartutullu inuunitsinni silap pissusiata allanngoriartornerata uatsinnut sunniutai saqqummiuppakka, namminerlu aalisartutut piniartutullu misigisakka takusakkalu aallaavigalungit saqqummiussillunga. Aammalu siulinnit ilisimasat uannut ingerlateqqinneqarnikut saqqummiullugit. Lars Peter Mølgaard taama oqartoq ICC-p tusagassiuutinut nalunaarutaani allaqqavoq.
- Silap allangoriartornerata immallu sikusarnerata ukiuni siusinnerusuniit massakkumut allannguutai ilanngullugit saqqummiuppakka. Ilaatigut piniakkat tikittarlutillu aallartarfiisa nikikkiartornerannik kinguneqarput piniariaatsinillu assingiinngitsunik atorneerullutillu puigugaajartulerneranik kinguneqarlutik, taanna oqarpoq.
Naalagaaffiit Peqatigiit COP27-mik taallugu tallimanngornerup tungaanut ataatsimeersuartitsipput.