Naatsiianik katersineq ingerlanneqaleruttortoq

Aasaanerani siallernera nillerneruneralu naatsiiaanik ukioq manna katersinermut qaammatip ataatsip missaanik kinguaattoortitsivoq, nillernerami pissutigalugu naatsiaat arriinerusumik naapput.
 
Taamaammat ukioq kingulleq naatsiiartat 110 tonsiusut ukioq manna 60 tonsiinnaanissaat, Neqip tunitsiviani pisortap, Viggo Djurhuusip naatsorsuutigaa.
 
Illuatungaanili Kujataani naatsiiartat nalinginnaasumik pitsaanerujussuunerat pisisartut nuannaarutigisinnaavaat.
 
- Naatsiianik naatitsisartut suleqatigalugit naatsiiat katersorneqartut pitsaassusissaannut nutaamik piumasaqaasiortoqarpoq, Viggo Djurhuus oqarpoq.

AAMMA ATUARUK Mange kunder til kartofler fra Neqi A/S, når kvaliteten forbedres

- Naatsiiat tunineqartut pitsaassusaat misilittarparput taamaalilluta pisiniarfinnut nassiussavut pitsaanerpaanissaat qulakkeerniarsaralugu, tunitsivimmi pisortaq oqarpoq.
 
Tamatuma saniatigut immikkoortiterissummik nutaaliamik, angissusaannik immikkoortiterisinnaasumik Neqimit puussianut nutaanut issoraassisinnaasumik pisisoqarpoq.

AAMMA ATUARUK Savat neqaannut naatsiianullu akit isumaqatigiissutigineqartut

Ukioq kingulleq ajornartorsiutaasoq, tassa naatsiiat katersorneqartut 40 tonsit naleqqutinngitsumik uninngasuutigineqarnerat pissutigalugu igiinnarneqartariaqarsimapput. Taamaammat Nuummi, Sisimiuni Ilulissanilu naatsiiat pitsaasumik uninngasuutigineqarnissaannut KNI Engros suleqatigineqarpoq.
 
- Ukioq manna naatsiianik katersat maanna Kitaanut nassiussorneqarput, 3 tonsillu Tunumut nassiunneqarlutik, Viggo Djurhuus oqarpoq.