Naatsiaat pillugit isumaqatigiissuteqartut
Naatsiiat nunatsinneersut pisiniarfinni pisiarineqarsinnaasut 2020-mi amerlanerulaassapput.
Neqi A/S-ip tunisassiorfiani ingerlatsisoq, Ole Vestergaard, taama naatsorsuuteqarpoq.
Ingerlatseqatigiiffimmi naatsiianik pilersuisarnissamut Pilersuisumik, Brugsenimik Pisiffimmillu isumaqatigiissuteqarpoq.
Isumaqatigiissuteqarmata, pisiniarfiit naatsiianik qaqugu qanorlu amerlatigisunik tunineqartassanersut maanna pilersaarusiaqalerpoq. Taamaalilluni pisiniarfiit Danmarkimit naatsiianik septembarimit decembarimut pisariaqartitsinerat minnerulissaaq.
- Taakkununnga tamanut naatsiianik naammattunik neriorsuivugut. Taavalu naatsiaat katersorneqaqqammerneranni kalaallinut pisisartunut apuunneqarsinnaanissaat qulakkeerniarlugu pisiniarfiit danskit naatsiiaannik ikinnerusunik piffissami tassani pisiniarfimminniititaqarsinnaassapput, Ole Vestergaard oqarpoq.
AAMMA ATUARUK Vellykket høst: Dobbelt så mange kartofler i år
Neqi naatsiianik naammattunik pisiniarfinnut pilersuinissamik maannamut neriorsuuteqareersinnaasimanngilaq, naatsiiallu qaqugu tunniunneqarsinnaanersut pillugu qanimut ataqatigiissaarisoqarsimanani.
Taamaalilluni pisiniarfiit naatsiianik Danmarkimit pisiaqartariaqartarsimasut, ingerlatseqatigiiffik tusagassiuutinut nalunaarummi allappoq.
Naatsiiat 100 tonsit
Pisiniarfinnut isumaqatigiissut nunamut tamarmut atuuppoq. Kisianni:
- Najugaqarfinnut avinngarusimanerusunukaassinissaq soorunami ajornartorsiutigisarparput, Ole Vestergaard oqarpoq.
Neqi A/S naatsiianik 100 tonsinit amerlanerusunik 2019-imi pissarsivoq. Ukioq manna pissarsiassat taama amerlatigipajaarnissaat naatsorsuutigineqarpoq.
Ingerlatseqatigiiffik naatsiaanik katersineq atorluarnerujumallugu naatsiianut minnerusumik ajoqusersimasunut aamma periarfissarsiorpoq. Assersuutigalugu naatsiianut panertunut atorneqarsinnaasut, Ole Vestergaard paasissutissiivoq.
