Naartusut atornerluisut ikiorneqarnerunissamik pisariaqartitsipput

Naartusunut angajoqqaanngorlaanullu hashimik imigassamillu atornerluisunut toqqaannartumik iliuuseqarnissaq amigaataasoq, Siumut isumaqarpoq. Atornerluisummi amerliartornerat isumakulunnartoq, partii isumaqarpoq.

- Suliaq una ima annertutigaaq, suli siusissumik iliuuseqarniassagutta, naartusortatsinnut apuuttariaqarpugut. Angajoqqanngortussallu atornerluinermiit ingerlariaqqinnissaannut ikorfartorniarlugit pikkorinnerulluta toqqarnerusumillu iliuuseqartariaqarluta, Siumup siulittaasua, Aleqa Hammond, taama oqarpoq.

Radioavisemi ukioq oqaluttuaraarput, meeqqat Sanami novembarip qiteqqunneraniit januaarip naaneranut inunngortut tamarmik 15 perocentii hashimik atornerluisunik anaanaqartut.

Siumut siunnersuuteqarpoq, naartusut angajoqqaanngorlaallu oqaloqatigiittarfissaminnik, ikorfartorneqarfissaminnik aqqutissiuunneqartarfissaminnillu ornittagassaqartariaqartut.

- Angajoqqanngortussanut imigassamik ikiaroornartumillu ajornartorsiuteqartunut taakkua immikkut ittumik sammitinneqarnissaat siunnersuuteqarnitsigut, ilaqutariit aallaqqaataaniilli ilorraap tungaanut atugassaqartitsiniarneranni aqqutissiussineruvoq, Aleqa Hammond nassuiaavoq.

Naalakkersuisut siunnersuut tapersersorpaat, kisianni taamaaliornerminnut tungavilersuutigaat, tamatuma tungaatigut suliniutaalereersunut Siumup siunnersuutaa napertuuttoq. Pingaarnertut nuna tamakkerlugu suliniummi "Ilaqutariinnut meerartaartussanut piaartumik iliuuseqarnermi”, naartusunut assersuutigalugu atornerluisuuneq pissutigalugu immikkut pisariaqartitsisunut:

- Suliaq ingerlatereerparput, ”Inuunerittap” iluani ingerlatereeratsigu. atavalu aamma sulineq 2011-minngaannit annertusisillugu. Taamaalillutik 2011-minngaanniit naartusut tamarmik oqaloqatigineqarlutik misissorneqartarput, imigassamik ikiaroornartumillu ajornartorsiuteqarnersut, peqqissutsimut naalakkersuisoq, Agathe Fontain oqarpoq. Tassalu Siumup Siunnersuutaa akerlilivinngikkaluarlugu sulisoqareertoq unnerpaa:

- Soorunami sunaluunniit nutarterneqarsinnaavoq aamma pitsanngorsarneqarsinnaavoq. Kisianni massakkut sulinitta qiterarnerani nalilersuinermi paasineqarpoq, suliarput pitsaasumik ingerlasoq.
Taassuma paasissutissiinera naapertorlugu ilaqutariit naartusut tamarmiusut 16 procentii
suliniummut ilaasinnaasutut nalilerneqarsimapput.

Agathe Fontain naapertorlugu naartusut atornerluisarnerat pillugu suliniutit allat suut aallartinneqassanersut pillugit Namminersorlutik Oqartussat kommunillu maanna isumaqatigiinniarput.
Siumup siunnersuutaa siullermeeerlugu suliarineqarmat, Inatsisartuni partiinit tamanit tapersersorneqarpoq.