Naalungiarsuit toqutaanerat pissutaalluni napparsimmavimmi aqutsisut isornartorsiorneqartut
Peqqissaasup Lucy Letbyp naalungiarsunnik arfineq-marlunnik toqutsisimasutut, naalungiarsunnnillu allanik arfinilinnik toqutseriarsimasutut pasineqarluni eqqartuussaanikup mianerineqarnissaa, Tuluit Nunaata avannamut kippasissuani Cheshiremi napparsimmaviup alaatsinaafffigisimanngilaa.
Napparsimmavimmi aqutsisut nakorsallu Letbyp toqutsisarnerarlugu mianersoqqussutigineqarnissaanut taamaattoq tunuarsimaarsimapput.
Suliap misissuivigineqarnissaa tuluit naalakkersuisuisa piumasarisimavaat. BBC taama allaaserisaqarpoq.
Napparsimmavimmi siunnersortaanerup Stephen Breareyp napparsimmavimmi aqutsisut pasilliuteqarfigai.
Ernumassutit qisuariarfigineqarsimanngitsut
Immikkoortortami siunnersortaaneq Letby pillugu 2015-imi siullerpaamik ernumassuteqarsimavoq.
Tassungali atatillugu qisuariartoqarsimanngilaq, Letbylu naalungiarsunnik tallimanik kingorna toqutseriarsimanerarneqarpoq, taakkunanngalu marluk tassani toqutaallutik.
Naalungiarsuit toqutaasut siulliit tallimat 2015-imi oktobarimit 2016-imi juunip tungaanut toqutaapput.
Peqqissaasup naalungiarsuit piaaraluni napparsimalersissimavai, ilaatigullu nakuuserfigineqarlutik, insulinimilluunniit tunineqartarsimallutik.
