Naalakkersuisoq: Inatsisip nutaap suliani kukkuluttortoqaqqinnginnissaa qulakkiissavaa

- Qulakkeerpaa siumut sammisumik oqarutta taamatut pisoqaqqinnginnissaa qulakkeerniarlugu.

Isumaginninnermut naalakkersuisoq Martha Abelsen ombudsmandip Avannaata Kommunia pillugu sakkortuumik isornartorsiuneranut tunngatillugu taama oqaaseqarnermigut qisuariaateqarpoq.

Ombudsmandimmi Avannaata Kommunia suliamik meeqqamut angerlarsimaffiup avataanut inissinneqarsimasumut tunngasumik ukiuni tallimani uninngatitsisimaneranut tunngatillugu isornartorsiorpaa.

- Omsbudsmandip isornartorsiuinera pissusissamisoorluinnartutut isigaara, ukiut tallimanik taama sivisutigisumik suliap ingerlasimanera akuerineqarsinnaanngilluinnarmat, Martha Abelsen oqarpoq.

AAMMA ATUARUK Ataatsimiititaliaq: Suliamik taama sivisutigisumik suliarinnittoqarsimanera akuersaarneqarsinnaanngilaq

Suliarlu ullumikkut pissutsinut ersiutaanngitsoq, taanna isumaqarpoq.

- Una ukiunik tallimanik pisoqaassuseqarpoq, meeqqanut tapersersuinermut inatsit 2017-imi juulip aallaqqaataani atuutilersup qulakkeertussaavaa sulianik taama ittunik takoqqinngilluinnarnissarput.

Inatsit atuutilermat isumaginninnermut aqutsisoqarfimmit kommunit isumaginninnikkut sulianik sumiginnaasimappata nakkutigineqartalernikuupput. Isumaginninnikkut suliat kukkuluttorfigineqannginnissaat anguniarlugu ilaatigut kommunini sulisut sanileralugit ilinniartinneqarsinnaapput ilinniagaqarnikkulluunniit.

Isumaginninnermi malittarisassanik kommunit aqutsinerannik atorunnaarsitsisinnaaneq Naalakkersuisut ukiut arlaqangitsut matuma siorna atuutilersippaat. Periarfissaq tanna Martha Abelsenip kingullerpaatut atorusunneruaa.

- Ima ittunik sulianik takoqqinnginnissarput iliuuseqarfigalugu, pikkorissaajuarnissap, ilitsersuiuarnissap, qanorlu ililluni aqqutissiuiuarnissap siulliunneqartuaannarnissaa qulakkiissallugu Naalakkersuisut tungaaninngaaniit pisussaaffeqarnerput naammasserusunneruarput.

AAMMA ATUARUK MIO aamma Meeqqat Ikiortigit kommunip suliamik isumaginninnera sakkortuumik isornartorsioraat

Paarlatuanilli suna ajornartoersiutaanersoq paasiniarlugu kommunit oqaloqatigieqartariqarput, taavalu iliuusissat, meeqqanut tapersersuinermut inatsimmi, isumaginninninnermut aqutsisoqarnermi nakkutilliiartortartoqarnermilu periarfisssasut aallartinneqartariaqarput .

Martha Abelsenip siunissami kukkusoqaqqinnginnissamik neriorsuisinnaanngikaluarluni, Avannaata Kommuniani pisimasutut ittunik pisoqaqqissanngitsoq upperaa.

- Inatsisip juulip aallaqqaataani 2017-imi atuutilertut qulakkeertussaavaa sulianik ima ittunik takoqqinnginnissarput