Kulturi

Naalakkersusuisup arnat sorsuutiginiarpai

Naligiissitaanermut Naalakkersuisuusoq Martha Lund Olsen isumaqarpoq ulloq arnat pisinnaatitaaffimminik sorsuffiat sapaammi martsip 8-ni pisussaq tassaassasoq inuiaqatigiittut unammillernartut nalaanneqartartut ulloq taanna ukkatarineqarnissaannut peqqutissaalluartoq.

Allattoq Hagen Højer Christensen, Nauja Møller

marsip 07-at 2015 15:37

- Niviarsiaqqanut arnanullu nakuusernerit kinguaassiuutitigullu innarliinerit amerlavallaaqaat. Tamanna akuersaarneqarsinnaanngilaq ilaatigullu nakuuserneq akiorniarlugu 2014-2017-imut iliuusissatut periusissatullu pilersaaruterput aqqutigalugu tamanna unitsinniarsaraarput, Martha Lund Olsen allappoq.

Ukiormanna Danmarkimi persuarsiutigineqarpoq, arnat folketingimut taasisinnaatitaalerneraniit ukiut hunnorujunngortorsiornera.

Nunatsinnilu aatsaat 1948-mi arnat taasisinnaatitaaleraluarput- tassanilu anguneqarpoq naligiissitaaneq, tassaasoq isumaqartoq nunatsinni oqartussaaqataaffiusuni arnat angutillu assigiinnerusumik agguarneqarnerat.

Naak sivikinnerusumik taasisinnaatitaasimagaluarlutik angutitulli angusaqarsinnaanertik kalaallit arnartaasa takutissimavaat, pineqartullu ilaanni ilaatigut ilinniartitaanikkut angutit qaangersimallugit, Martha Lund Olsenip ilalerpaa.

- Arnat Nunatsinni naligiissitaanermut tunngatillugu inissisimalluarput. Ilinniagaqartarput suliffeqarlutillu, naalakkersuinermi, inuussutissarsiornermi kultureqarnermilu peqataatitaqarluarput, sulilu angerlarsimaffinni sulinerup ilarujussuanik isumaginnittuullutik. Nunatsinni inuiaqatigiinni angutit arnallu tamarmik inissaqartinneqarnerat pitsaasuuvoq. Tamatumani paasinarsisinneqarpoq inuiaqatigiinni nutaaliaasuni tamanut inissaqartitsiviusuni inuusugut, Martha Lund Olsen taama naggasiivoq.

Aamma atuaruk Angutinut naleqqiullugu arnat amerlanerit ilinniagaqartarput