Angutinut naleqqiullugu arnat amerlanerit ilinniagaqartarput
Arnat 16-ileereersimasut meeqqat atuarfiat qimareerlugu ukiut qulit kingulliit ingerlaneranni ilinniagaqarsimasut 8 procentpointimik qaffariarsimapput, piffissap taassuma iluani angutit affaannarmik qaffariarput, tassa 4 procentpointimik.
Aamma atuaruk Ilinniagarissaarneruleriartorpugut
Taama ineriartorneq Nunatsinni inuussutissarsiornerup allannguuteqarsimaneranut atavoq. Ilisimatusarfimmi inuiaqatigiilerinermi adjunkt Mariekathrine Poppel nassuiaavoq.
- Inuussutissarsiornerup aaqqissugaanera angutit suliffigisartagannaaviniit - soorlu piniarnermit aalisarnermiillu - suliffinnut sulissussinernut, peqqinnissaqarfimmi, isumaginninnermi ilinniartitsinermilu suliffinnut nuussimapput, arnanut saaffiginninnerusunut. Tamannattaaq ilinniartitaanerup aaqqissugaanerani ersertoq, Mariekathrine Poppel oqarpoq.
Arnat kisimiillutik pilersuisut amerlisimapput
Tamatuma saniatigut arnat kisimiillutik pilersuisuusut amerlisimapput, tamannalu amerlasuunut ilinniagaqarnissamut peqqutaalluartarpoq:
- Akissarsiarissaakannerfiusumik suliffittaarniaraanni ilinniagaqarneq aqqutissaq annersaasoq, Mariekathrine Poppel oqarpoq.
- Ilaqutariippassuarni takornartaanngilaq angerlarsimaffinni suliassanut naliginnarnut niviarsiaqqat annerusumik akisussaaffilerneqartarneri, assingusumilli nukappiaqqanut akisussaaffilissanani.
Nukappiaqqat akisussaaffilersortariaqarput
Naatsorsuutini angutit arnanut naleqqersuutilissappata, ilisimatusartoq naapertorlugu aamma nukappiaqqat angerlarsimaffinni akisussaaffilersortariaqarput.
- Meeqqat atuarfianni akisussaaffimmik tigusilluarnerusinnaalissapput, taamaalillutillu niviarsiaqqatulli ilinniarfissamik aallartitsisinnaalluarsinnaanerullutik, Mariekathrine Poppel oqarpoq.
Praktikkerfissaqarneq iluaqutaasinnaavoq
Inuussutissarsiutitaarniarlutik ilinniagaqartunut aamma praktikkerfissanik pilersitsineq iluaqutaasinnaavoq, anguterpassuimmi praktikkerfissaqannginnertik ilinniakkaminnik naammassinngitsoorutigisarpaat.
Aamma atuaruk Ilinniartitaaneq pillugu qineqqusaartut oqallitsinneqarnerat takoqqiguk
Nukappiaqqat ilinniagannaavini, assassornermik suliaqarfiusuni, ukiut kingulliit marlussuit ingerlaneranni praktikkerfissat ikilinikorujussuusut, Mariekathrine Poppel oqaluttuarpoq.
Nunatsinni arnat 16-ileereersimasut 2013-imi 37 procentii meeqqat atuarfiat qimakkamikku ilinniakkamik naammassinnissimapput. Asserluinnaani angutit 16-ileereersimasut "taamaallaat" 34 procentii.