Naalakkersuisut aalisakkanut akitsuutinik nutaanik eqqusserusuttut
Saarulliit, saarulliit ilaat kullerit, saarulliusaat suluppaakkallu akitsuuserneqarpata Nunatta karsianut 15 millionit koruuninik isertitsissasut aningaasaqarnermut naalakkersuisup Randi Vestergaard Evaldsenip naatsorsuutigaa.
Nunat allat aalisarnikkut oqartussaaffigisaanni, nunat tamat imartaanilu aalisarnermi pisarineqartartut, Tunumi aalisakkat ikerinnarsiortut akitsuutaannik, atuuttussanngortitsinissaq Evaldsenip siunnersuutigaa.
Tamannalu 3 millionit koruuninik isertitaqarfiunissaa naatsorsuutigineqarpoq. Akitsuutillu nutaat atuutilissapata, katillugit 18 millionit koruuninik isertitaqarnissaq naatsorsuutigineqarpoq.
Akitsuusiiniarnerli Sulisitsisunit, GE-mit isornartorsiorneqarpoq.
Akitsuusiiniarnermut atatillugu sukkavallaartumik suliarineqarsimavoq, GE-p pisortaa Brian Buus Pedersen isumaqarpoq.
Aalisarnerup iluani suliaqartut politikerillu aalisarnermi pissarsiassat aalisartunut inuiaqatigiinnullu qanoq iluaqutaanerpaajusinnaanersut oqaloqatigiissutigisariaqaraluaraat, Brian Buus Pedersen isumaqarpoq.
Oqaloqatigiinniarnissarlu ajornarpallaarnavianngitsoq taanna isumaqarpoq.
- Oqaloqatigiinnerup aallarnisarneqarnissaa taamaammat ajornarnavianngilaq. Ataqatigiinnerusumik ingerlatsineq taama qulakkeerneqarsinnaavoq. Oqaloqatigiinnissarli amigaatigiinnarparput. Aallarnisarneqanngippat naalakkersuisoqarfiit assigiinngitsut aalisarnermut aningaasaqarnermullu polikkikkut anguniagaat assigiinngiiaarpallaalissapput, Brian Buus Pedersen oqarpoq.
Naalakkersuisulli siunniussartik aalajangiusimavaat.
- Angusaqarfiulluartumik aalisarneq isumalluutinit iluanaaruteqarfiunerussaaq. Inuiaqatigiit isumalluutinit iluanaarutit ilaannik naammaginartunik pissarseqataassapput, tassa isumalluutinik atuinermi akitsuutitigut, Naalakkersuisut oqaaseqaatiminni taama allapput.
