Naalakkersuisut Tunumi aalisarnermik suliallit periarfissikkusukkaat
Aalisarnermut Piniarnermullu Naalakkersuisoq Karl-Kristian Kruse, Siumut sinnerlugu Inatsisartuni ilaasortap Laura Táunâjiip § 37 najoqqutaralugu apeqquteqaataanut akissuteqarnermini ilaatigut taama allaaserisaqarpoq.
- Aalisarnerup inuussutissarsiummilu tassani pitsaanerpaamik ineriartortitsinissanut aalisakkallu atorluarnissaanut sinaakkutissaqarnissaq Naalakkersuisut suliassaraat, minnerunngitsumik periarfissaalersussat atorluarnissaat eqqarsaatigalugit, Karl-Kristian Kruse oqarpoq.
Tunumi aalisarnerup ineriartortinneqarnissaanut, soorlu sinerissamut qanittumi misileraalluni aalisartitsinerit aqqutigalugit ineriartortitsinerit Naalakkersuisut sulissutiginiarpaat.
Tunumi aalisarsinnaanissamut periarfissanut nalequssaanissaq siunertaralugu aalisariutinik naleqqussaasinnaanissaq siunertaralugu Tunumi umiatsiaaqqatigut aalisariutitigullu pitsanngorsaasinnaanissami pisariaqartitsinerit periarfissarititaasullu qulaajarneqarnissaat, Naalakkersuisut tamatuma saniatigut sulissutiginiaraat, Aalisarnermut Naalakkersuisup oqaatigaa.
Ingerlatseqatigiiffik Arctic Prime Fisheries Kuummiuni tunitsiviutiminik ammaaqqissinnaanissaminut ammavoq, tassa aalisakkat ukiumut 150-200 tonsit tulaanneqartalerpata tunitsiviup ammaqqinneqarnissaa Arctic Prime Fisheriesip ammaffigigamiuk.