Naalakkersuisut uuliasiornissamik Kinami paatsuunganartuliortut

Naalakkersuisunut ilaasortat sisamat maannakkut Kinamut tikeraarput, taamaalillutillu nunat assigiinngitsut akornanni alaatsinaanneqarlutik. Nutaarsiassaqartitsiviup Reutersip aatsitassanut naalakkersuisoq Múte B. Egede danskit aallartitaqarfianni Kalaallit Nunaata ulluani marlunngornermi oqaloqatigisimavaa.

Tassani nutaarsiassaqartitsivimmut Egedep oqaluttuaraa Kalaallit Nunaata kitaani oliasiornissamut gasimillu ujarlernissamut 2018-imi ammaassisoqarniartoq. Imitassarsiorneq tamanut ammasuussasoq Naalakkersuisullu pitsaanerit toqqartassagaat.

Reutersimut Egedep erseqissaatigaa, kitaata imartaata naqqani olia nappartat 17 milliardit nalingisa missaanniittunik peqartoq.

Oliamik gasimillu ujarlernissamut imitassarsiornissamut pilersaarut kingusinnerusukkut Naalakkersuisunut ilaasortap allap illuatungilerpaa - tassa Inuussutissarsiornermut, Niuernermut Nukissiuuteqarnermullu Naalakkersuisup Hans Enoksenip.

AAMMA ATUARUK Naalakkersuisut sapaatip akunnerani uani Nunarput imminiipajaarsimavaat

Tusagassiortunik katersuutitsinermi Hans Enoksen oqarpoq Kalaallit Nunaat pilersaaruteqanngitsoq oliamik gasimillu ujarlernissamut imitassarsiornissamut, tassami Kalaallit Nunaata nukissiuutit ataavartut ukkatarimmagit.

Reuters allappoq naalakkersuisunut ilaasortat marluk assortuuttunik paaasissutissiinerat paasiniagassaasimanngitsoq, danskillu aallartitaqarfianni tusagassiisarnermik suliallip aamma taamaattoqarnera nassuiarsinnaasimanngikkaa.

KNR-ittaaq naalakkersuisunut ilaasortat marluk assigiinngitsunik oqaaserisimasaat pillugu nassuiaatikkusussimagaluarpai iluatsinnaguli.

AAMMA ATUARUK Naalakkersuisunut ilaasortat sisamat Kinamut pilerisaariartulersut