Naalakkersuisut sapaatip akunnerani uani Nunarput imminiipajaarsimavaat
Siulittaasoq Kim Kielsen, Hans Enoksen, Karl Kristian Kruse kiisalu Mute Bourup Egede peqatigalugit Kinaliarsimapput.
Sisamaallutik angalaqatigiikkaluartut annermik pingasuukkajunnerussapput. Mute B. Egedep immikkut ataatsimiiffissaqarnerani Kielsen, Enoksen aammalu Kruse imminnut qanilliivillutik angalaqatigiinniarunarput.
Marlunngorneq ilaatigut atorneqarsimavoq Kiinamiut nunanut allanut ministeriaqarfia, sanaartugassanik suliassinneqartartut entreprenørit, aningaaserivik kiisalu Kinamiut aatsitasssarsiornermut tunngasunik peqatigiiffiat ataatsimeeqatigalugit.
Taamaasineranilu Naalakkersuisut arnartaat Kalaallit Nunaat sinnerlugu Nunat Avannarliit Siunnersuisoqatigiivisa 69-issaanik Finlandip illoqarfiata pingaarnersaani Helsinkimi ataatsimiittuniipput.
Naalakkersuisut Siuttaasuata tullia Sara Olsvig, Agathe Fontain kiisalu Doris Jakobsen Jensen ataatsimiinnermi peqataapput. Nunat Avannarliit qanoq, nunarsuarmi nunani tamani, nuna immikkoortoq annerpaamik peqataatitsisuusoq, qanoq suli pitsanngorsarneqarsinnaanersoq ataatsimiinnermi sammineqarpoq.
Aqqaluaq B. Egede Erik Jensenilu nunatsinniittutuaapput, taakkulu suut tamaasa paariniarpaat, pingasunngorpat novembarip 1-ata tungaanut, taamaasippat Suka K. Frederiksen naapparsimalluni sullinngiffeqareerluni utertussaammat.
