Ruslandip Ukrainemut saassussinerata kinguneranik EU Ruslandimut mattussivoq.Assi: Scanpix

Naalakkersuisut Ruslandimut mattussisinnaanngorniartut

Naalakkersuisut Ruslandimut mattussisinnaalernissaannut inatsisissatut siunnersuut Inatsisartuni ullumi sisamanngornermi oqaluuserineqassaaq. Ruslandip Ukrainemut saassussinera tassani tunngavigineqarpoq.

Naalakkersuisut siulittaasuata, Mute B. Egedep (IA), Naalakkersuisut Ruslandimut mattussisinnaalernissaat Inatsisartunut ullumi siunnersuutigaa. 

Siunnersuut nukingisaarutaasumik immikkullu ittumik Inatsisartut massakkut upernaakkut ataatsimiinneranni saqqummiunneqarpoq. 

Rusland inatsisinik unioqqutitsilluni Ukrainemut februaarip 24-annili saassussisaqattaareersorlu tamanna siunnersuutigineqarpoq. EU Ruslandimut tamatuma kingorna assigiinngitsutigut mattussisareerpoq. 

Tamanna Ruslandip ilaatigut nunanik tamalaanik niueqateqarsinnaajunnaarneranik kinguneqarpoq. Inatsisissatut siunnersuut akuerineqassappat, Naalakkersuisut aamma mattussisinnaanngussapput. 

Royal Greenlandip Ruslandimut niuernini unitsereerpaa.

Danmark EU-mi ilaasortaavoq, taamaammat mattussisunut aamma akuuvoq. Nunarpulli akuunngilaq. 

Naalakkersuisut EU-p, nunat tamalaat kattuffiillu mattussineri tamarmik nunatsinni aamma atuussinnaanissaannut Naalakkersuisut akuersissuteqarsinnaasut, inatsisissatut siunnersuummi allaqqavoq. Tamannali nunatta akisussaaffeqarfigisaanut taamaallaat atuutissaaq. 

Naalakkersuisut mattussinissaminnut namminneq aalajangeeqqusaanavianngillat. 

Taamatut mattussinerit Ruslandip Ukrainemut saassussineranik akerliliineruvoq.

Aningaasaqarnikkut kingunissat

Inatsisissatut siunnersuut Inatsisartut akuerissappassuk, Naalakkersuisullu mattussissappata, tamanna nunatsinnut kinguneqassaaq.

Ruslandimut niuernerit, tunisinerit suleqateqarnerillu tamarmik unissapput. Tassalu inuussutissarsiortut aamma kalluarneqassapput.

Nunatta aalisakkat qaleruallillu avammut tunisaasa 13 – 14 procentii Ruslandimut tunineqartarput.

AAMMA ATUARUK Sanktioner mod Rusland kan også gå udover grønlandske virksomheder

Suliffeqarfiit mattussinermut maleruagassanik unioqqutitsisut akiligassinneqarsinnaapput.

Mattussinerit

EU-p Ruslandimut mattussineri arlaqarput.

Tassalu februaarip ulluisa 23-ata apriilillu ulluisa arfineq-pingajuata akornanni tallimariarlutik mattussipput.

Mattussinerit ilagaat russit nuimanerit EU-mut iseqqusaanngimmata, niueqatigiinnermut mattussineq, sorsunnerunngitsumut atugassatut nioqqutissanik, angisuunilli aseruissutissatut sakkussiornermi atorneqarsinnaasunik Ruslandimut tunisinissamik inerteqqut.

Russip aningaaseriveqarfii nunat tamalaanit ingerlanneqartut SWIFT-imit piiarneqarput.

Inatsisartut siunnersuut akuerissappassuk, Naalakkersuisut akisussaaffeqarfinnik sorlernik mattussissanerlutik aalajangissavaat.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl