Naalakkersuisut qilalukkanik pisasseqqiipput

decembarip 07-at 2006 13:47

Naalakkersuisut ullaaq manna ataatsimiikkamik qilalukkanik pisasseeqqinnissartik isumaqatigiissutigaat.

- Pisasseeqqinnissaq isumaqatigiissutigaarput, erseqqissaatigissavarali imaanngimmat ippassaani Uummannap borgmesteriata pisassinneqarnissamik noqqaanera tunngavigiinnarlugu taamatut aalajangiisugut. Novembarip 20-iani allammata novembarip 23-iani akivagut, Piniarnermi naalakkersuisoq Finn Karlsen oqarpoq

Taanna oqarpoq, Uummannap kommunia kisiat eqqarsaatiginagu 100-nik pisasseeqqillutik.

- Upernavik, Uummannaq, Qeqertarsuullu tunua eqqarsaatigalugit pisasseeqqippugut taakkulu 100-t taakkunani agguaanneqassapput, oqarpoq.

Aperaarput pisassiissutit amerlassusaannut suut tunngavilersuutaasimanersut.

- Piniartut ilisimasaat upperilluinnaqqissaarlugit eqqartuivugut. Piniartuinnaanngitsut aamma inuinnaat unnersiorput aatsaat taamak qilalugaqartigineranik takusarsimallutik, Finn Karlsen oqarpoq.

Taanna aamma erseqqissaavoq siusinnerusukkut sikusarnerata nalaani sassisarnerup nalaani qilalugarparujussuit sikup ataani toqorartarsimagaluartut aammalu siusinnerusukkut ungooraluni toqoraasoqartarsimagaluartoq maannali tamatuma atugaajunnaarsimanera tunngavilersuutigineqartunut ilaasoq.

- Piaqqat aamma amerlasoorparujussuanngornikuupput taamaattumik sukkasuumik amerliartornerat oqaatigineqarpoq tamakkulu tunngavigalugit 100-nik qaffaaqqippugut, oqarpoq.

Qalleqqissaavoq siunissami pisassiinermi tunngavilersuutigineqartussat amerlanerusut piumallugit aningaasaliinerunissaq eqqartorsimagitsik.

- Canadamiit ilisimatuut suleqatigalutigit erseqqinnersumik tunngavissaqarnissarput anguniarlugu aningaasaliiniarpugut, Finn Karlsen oqarpoq.

Uummannap kommunianut pisasseeqqinnermik aalajangiineq nutaaq suli tusarliunneqarsimanngilaq.

Uummannap borgmesteria angalavoq borgmesterimullu tullersortaagallartoq Karl Tobiassen oqarpoq, pisassat qasserpiaanerat suli nalugaluarlugu pisassinneqartussanngornertik iluarisimaaritsik.

Ilanngutassiaq Karline Platoumit suliarineqarpoq.