Naalakkersuisut niisat piniagaanerat aqukkusuleraat

Niisat killeqanngitsumik maannamut piniagaapput. Naalakkersuisulli aappaagumit killilersuerusupput.
- Isumaqarpunga pingaaruteqartorujussuusoq. Aamma inuiaqatigiittut uagut nunatsinni kulturitsinnut naapertuuttuuvoq, Aqqaluaq B. Egede oqarpoq. Assi © : KNR
Allattoq Andreas Wille
januaarip 12-at 2022 06:03

Kalaallit Nunaanni niisat manna tikillugu killeqanngitsumik piniagaapput. Naalakkersuisut nunatta kitaani tamanna allanngortikkusuppaat. Tassa aappaagumit niisattassiisalerusupput.

- Piujuartitsinissap nunarsuarmi annertusiartortumik suliarineqarnerata ilaatut niisa massakkut killiffigineqarpoq, Aalisarnermut piniarnermullu naalakkersuisoq, Aqqaluaq B. Egede oqarpoq.

Piniarnermut nalunaarsukkat naapertorlugit, nunatta kitaani, tassani avannaa kujataalu ilanngullugit, 2011-mit 2019-imut niisattat 22.746-sut, Naalakkersuisut pisassiisalernissamut tusarniaanerminni allapput. Taakkuninnga 2774-it 2019-mi pisaapput.

NAMMCO-p ilisimatuussutsikkut ataatsimiititaliaata nunatta kitaani niisattassat amerlanerpaamik ukiumut 1869-nissaat innersuussutigaa.

Tamannali malinneqassanersoq naalakkersuisup akiumanngilaa.

- Isummerpallaartinnanga misissoqqaarusuppara misissueriaaseq qanoruna ittoq atorlugu taakkua kisitsisit nalunaarsorneqarsimappat, Aqqaluaq B. Egede oqarpoq.

AAMMA ATUARUK Arferit mikinerit piniagaanerat malittarisassiuunneqalersoq

Tunumi niisattassanik killilersuisoqarnissaanik innersuussisoqanngilaq. Taamannali killilersuilinnginnermik isumaqanngitsoq, naalakkersuisoq oqarpoq. Tunumi politikkikkut killiliisinnaaneq taassuma periarfissaatippaa.

Qilalukkat ukiumut pisarineqarnerpaasarput. Niisa arferni mikisuni kitaani pisarineqarnerpaanut tulliusoq nalunaarsukkat takutippaat.

Tamannalu aamma tunngavigalugu killilersuilernissaq pingaartinneqarpoq.

- Isumaqarpunga pingaaruteqartorujussuusoq. Aamma inuiaqatigiittut uagut nunatsinni kulturitsinnut naapertuuttuuvoq. Isumaqarpunga pitsaasumik alloriarfissalerlugu aamma inissiiffigigipput, Aqqaluaq B. Egede oqarpoq.

Naalakkersuisut arfernik mikisunik, qilalugaanngitsunik, aatsaavissuaq amerlassusiliilluni innersuussisoqartoq allapput.