Arferit mikinerit piniagaanerat malittarisassiuunneqalersoq

Suliniutigineqartorlu Pinngortitalerfimmit nuannaarutigineqarpoq:

- Sivisuumik suliarineqarsimavoq, maannalu kiisami timitaliisoqarnissaanut piffissanngorsimarpasippoq, Fernando Ugarte, Uumasunut miluumasunut Timmissanullu immikkoortortaqarfimmi pisortaq oqarpoq.

Niisanik, aarluarsunnik ananarnillu pisarineqartut ima ikitsigaat, Pinngortitaleriffiup ajornartorsiortitaasutut isiginagit. Niisalli 2000-3000-it ukiumut tamaasa pisarineqartarnerat, amerlassusaannut ajornartorsiulersitseratarsinnaasoq oqaatigaa.

- Siornatigumut pisarineqartartut amerlisimanerat nalunngilarput. Pusarineqartartullu ima amerlisimatigaat piniarnerup aqunneqarnissaa pisariaqalersimalluni.

Nunat atlantikup avannaaniittut miluumasut imarmiut pillugit kommissioni, Nammco, Fernando Ugartep ilaasortaaffigisaa, piniarneq pillugu siunnersuisinnaasunik niisat pillugit suleqatigiissitaliortoqarnissaanik aalajangersimavoq.

Nunatsinni pisanut kisitsisaagallartut 2011-moortut 2.800-t sinnerpaat, 2012-imullu kisitsisit 1.960-iullutik. Aarlunni pisat aamma amerliartorput, 2007-mi pingasut pisarineqarput, 2011-mi 22-it nalunaarutigineqarsimallutik 2012-imilu 34-it.

- Aatsaat ajornartorsiutaalerpoq, aamma Tunumi pisaasartut amerlingaatsiarsimapput, immaqa sikup piniakkallu ingerlaartarnerisa allannguuteqarnerat pissutigalugu. Tasiilami ukiuni kingullerni tallimani ukiut tamaasa aarlunnik pisaqartoqarsimavoq, pisallu amerlammata immikkut isiginiarneqartariaqarpoq, Fernando Ugarte oqarpoq.

- Kiisami. 2-3000-inik pisat uannut amerlasuupilussuupput. Arferit mikinerit piujuaannartitsinissamik tunngaveqartumik piniagaanissaannut tunngatillugu misissuilluni suliniuteqartoqarnissaa neriuutigaara, issittumi uumasunik ilisimatooq Eva Garde, arferit pillugit immikkut ilisimasalik oqarpoq. Aarluit aarluarsuillu piniagaanerisa immikkut isiginiarneqalernissaat aamma neriuutigaa.

Arferit mikinerit nunatsinni piniakkat malittarisassiuunneqarsimanngitsut kingullersarivaat. Aalisarnermut, Piniarnermut Nunalerinermullu Naalakkersuisoqarfimmi allaffimmi pisortaq Amalie Jessen naapertorlugu, nalunaarutissaq killiliussatut nalunaarutaassaaaq, arfernillu mikinernik pisassiisoqartalissanersoq oqaatigisinnaanngikkallarnerarpaa, nalunaarutilli sivisuumik suliarineqarsimanera ilumoornerarpaa. Tamanna naalakkersuisoqarfimmi sulisussaaleqisimanermik pissuteqartoq, oqaatigaa.

AC-fuldmægtigimik atorfinitsitsisoqarneratigut malittarisassat nutaat 2013-ip ingerlanerani inaarsarneqassapput, 2014-illu ingerlanerani 15-imiluunniit atuutilersinneqarnissaat naatsorsuutigineqarluni, naalakkersuioqarfimmit oqaatigineqarpoq.

Arfernut mikinernut aamma qilalukkat qernertat qaqortallu ilaapput, taakkuli 2004-miilli killilersugaallutik pisassiissutigineqartalerput.