Naalakkersuisut mittarfiit pingaartillugit iliuuseqarniartut

Takornariat Nunatsinnut tikittartut ukiuni arlalinngortuni siullerpaamik amerliartoqqilerput. Air Greenland aasaq manna arlaleriarluni aatsaat taama ilaasoqartigivoq nunaniillu tamalaanit takornariat aamma amerliartorlutik.

Taamaammat nunat atlantikumiittut suleqatigiiffianni Vestnorden Travel Martimi 30-ssaanik ingerlanneqartumi, Torshavnimilu ullumi aallartittumi kalaallit peqataatitaat isumalluarpalupput.

Tikikkuminassuseq pingaarnerpaavoq

Peqataasut ilagaat inuussutissarsiornermut naalakkersuisoq Vittus Qujaukitsoq. Ippassarlu ilisarititsilluni ataatsimiittoqarmat Naalakkersuisut takornariartitsinikkut pilersaarutaasa ilaannik saqqummiussivoq. Pilersaarutillu taakku, Qujaukitsoq naapertorlugu, nunarput takornarianut tikikkuminarnerulersissavaat.

- Aqqutilersuutit, akunnittarfiit, neriniartarfiit aaqqissuussinerillu allat ataqatigiissinniarnissaat siulliunneqartariaqarpoq, Qujaukitsoq taama oqarpoq.

Taanna nassuiaavoq mittarfiit umiarsualiviillu angalasunik sullissinerat pitsaanerulersinneqartariaqartoq aammalu Nunatsinnut silaannakkut angalaneq akikinnerusariaqartoq. Mittarfinnillu takinerusunik sanaartornikkut sipaarutissat amerliartuinnassapput, Qujaukitsoq taama oqarpoq.

Timmisartorniaannarlutik tikinneq-ajorput

Saqqummiisut allat ilagaat Visit Greenlandimi pisortaq, Anders Stenbakken. Mittarfiit pillugit pilersaarutit taassuma aamma tapersersorpai, aammali isumaqarluni Nunatta silarsuarmi saqqummilaalersinniarnissaanut suliniutinik ilaqartariaqartut.

Aamma atuaruk Visit Greenland: Asfalti takornariat pilerigisarinngilaat

Taamatullu oqarnera Air Greenlandimi tuniniaanermi pisortap Anika Kroghip ilalerpaa.

- Air Greenlandip timmisartuutaanut ilaaniarluni Nunatsinnukartoqarneq-ajorpoq, Krogh oqarpoq, nunatsinnut angalanerup siunertarisaa takornarianut pingaarnerusoq innersuussutigalugu.

Visit Greenland pinnagu mittarfiit aningaasaliiffigineqassapput

Naalakkersuisummi mittarfiit soqutigineruaat nittarsaassinissarlu sammivallaarnagu. Taamaammat Visit Greenlandip missingersuutai aamma 1,6 millionit koruuninik ikilileriffigineqarsimapput, ikililerineq siornali nalunaarutigineqartoq.

Taamatullu pingaarnersiuinissaq pisariaqartoq Qujaukitsup oqaatigaa.

Aamma atuaruk Naalakkersuisut: Visit Greenlandimut aningaasaliissutaasartut amerlineqassanngillat

- Aqqutilersuutit annertusarneqanngippata allaffissornermut nittartaassinermullu aningaasaliissuteqarnikkut takornariat amerlinavianngillat, taamaammat tamakkiinerusumik uanga isiginiarneruara. Takornariartitsinerup annertusaavigineqarnissaanut aqqutissatuaasoq tassaavoq aqqutilersuutinik pitsanngorsaanissaq, Qujaukitsoq taama oqarpoq.

Aamma atuaruk 725 millionit ukiualunni mittarfeqarnissaq qulakkiissavaat