Naalakkersuisut: Visit Greenlandimut aningaasaliissutaasartut amerlineqassanngillat
Visit Greenlandimi ileqquusumik ippassaq ataatsimeersuarnermi erseqqissaatigineqarpoq ukiumoortumik aningaasaliissutaasartut naammaannartarnerisa kingunerisaannik aningaasatigut sukangasuumik aqutsisoqartariaqartoq.
Taamaattumik siulittaasunngorlaap Kenneth Høeghip ukiumoortumik aningaasaliissutaasartut amerlineqarnissaat neriuutigaa.
-Suliassat piginnittullu piumasaat malillugit ingerlatsisinnaanissarput neriuutigaarput, neriuppungalu suliassat naammassineqarnissaat pillugu naammattumik aningaasaliiffigineqarumaartoq, Kenneth Høegh oqarpoq.
Piginnittut, tassalu Namminersorlutik Oqartussat sinnerlugit Naalakkersuisut siulittaasuat Aleqa Hammond ataatsimeersuarnermi najuuttoq erseqqissaavoq aningaasanut inatsit aqqutigalugu aningaasaliissuteqartoqaqqinnissaa siunertarineqanngitsoq.
-Aningaasaliissutit amerliartortinneqarnissaat naatsorsuutigineqarsinnaanngilaq, tamatta aningaasameerpugut. Taamaattumik pingaarnersiuinerput sakkortuvoq, suliffeqarfiup tamanna malinnaaffigisariaqarpaa. Inuiaqatigiinnut aningaasat amerlanerusut pilersissagutsigit periuserput aamma tulluarsartuaannartariaqarparput, Aleqa Hammond oqarpoq.
Visit Greenlandip ataatsimeersuarnerani siulersuisuni ilaasortat nutaat pingasut, tassaasut Karin Elisabeth Sinclair Strøm, Sakiko Daorana aamma Johanne Margrethe Bech ilaasortanngorput. Siulersuisuni ilaasortatut ingerlaqqippoq Salik Hard.
Siulersuisunngortut aningaasatigut allaanerusumik aqutsinissaat Naalakkersuisut siulittaasuata neriuutiginerpaa:
-Siulersuisuni ilaasortanngortut isumalluarnarput, nunanut allanut eqqarsarsinnaassuteqarlutillu suleqateqartarnikkut misilittagaqqortummata. Taamaattumik isumaqarpunga ingerlatsiviup siulersuisut suleqatigilluarnerisigut aningaasaliissutaasartut iluini pitsaasumik angusaqarsinnaasut.
