Naalakkersuisut kalaallinut atuartunut: Danmarkimiiginnaritsi
Kalaallit danskit efterskoliini, ilinniarnertuunngorniarfiini inuusuttulluunniit ilinniarfiini allani atuartut atuarfitsik sapaatini-akunnerni tulliuttuni matoqqasussanngoraluartorluunniit nunatsinnukarnatik Danmarkimiiginnassapput.
Naalakkersuisut taama tusagassiuutinut nalunaaruteqarput.
AAMMA ATUARUK Corona pissutaalluni Kalaallit Illuutaanni sullissinerit taamaatinneqarallartut
Kalaallit meeqqat inuusuttullu 18-iliineqanngitsut attaveqaatigisaminnut ilaqutarsiarisaminnut Danmarkimiluunniit qanigisaminnukassapput. Tamannalu periarfissaanngippat atuarfiup isumaqatigiissuteqarfigereerneratigut efterskoliminniiginnarsinnaapput.
Efterskolet amerlanersaat ammatinneqartut, efterskolet peqatigiiffiata Efterskolernes Foreningip oqaatigaa, atuartut pissutsit assigiinngitsut pissutigalugit angerlarsinnaanngitsut tassani najugaqarsinnaassallutik.
- Ilinniartunut ilinniarfinniiginnartussanut tunngatillugu ilinniarfiit / atuarfiit isumagisassaraat toqqissisimanartunik ajunngitsunillu atugassaqartitsinissat. Taamaattumillu ilinniarfiit sulissutigaat najukkani namminerni eqqorneqartunut tunngatillugu aaqqiissutissarsinissat, Ilinniartitaanermut naalakkersuisoqarfik taama ilaatigut allaaserisaqarpoq.
AAMMA ATUARUK Coronamik tuniluutsitsinaveersaarneq: Danmarkimi atuarfeqarfiit suliffeqarfiillu matusut
Inuusuttut 200-t 350-llu akornanniittut Kalaallit Nunaannit Danmarkimut efterskolerianngikkuni inuusuttuaqqanut ilinniarfinnulluunniit ukiut tamaasa ilinniariartarput.
Kalaallit Danmarkimi atuariartunngikkuni ilinniariartut pillugit apeqqutissaqaraanni Kalaallit Danmarkimi Illuutaasa ilinniarnermut immikkoortortaqarfiinut oqarasuaatikkut emailikkulluunniit saaffiginnittoqarsinnaavoq.
Ministeriunerup, Mette Frederiksenip atuarfiit ilinniartoqarfiit sapaatini akunnerni marlunniugallartoq matuneqartut pingasunngornermi nalkunaarutigaa. Tamanna coronavirusimik tuniluuttoqarneranut annikillisaaniarneruvoq.