Corona pissutaalluni Kalaallit Illuutaanni sullissinerit taamaatinneqarallartut
Kalaallit Aarhusimi, Aalborgimi, Odensemi Københavnimilu Illuuttaannukarnaveersaarit.
Kalaallit Danmarkimi Illuutaat ataatsimoorlutik taama nalunaaruteqarput. Kalaallit Danmarkimi Illuutaat sisamanngornermiit marsip ulluisa aqqaneq-aappaanniit pingasunngornermut apriilip aallaqqaataata tungaanut matoqqatinneqassapput.
Kalaallili Illuutaanni sulisut tamarmik angerlarsimaffimminnit sulissapput, oqarasuaatitigut emailikkullu attavigineqarsinnaassallutik.
Coronavirusip siaruatsaaliornissaa pillugu pisortat suliffeqarfiisa matugallarnissaannik, ministeriunerup ippassaq nalunaaruteqarnerata kingorna taama pisoqarpoq.
AAMMA ATUARUK Coronamik tuniluutsitsinaveersaarneq: Danmarkimi atuarfeqarfiit suliffeqarfiillu matusut
Inuit Kalaallit Illuutaanni sulisunik naapeqatigiinnissamik isumaqatigiissuteqartut tamarmik taamaatiinnarneqarput, soorlu aamma Kalaallit Illuutaanni pisussatut aaqqissuussat tamarmik, soorlu aamma illoqarfiit annerit avataanni pisussatut aaqqissuussat taamaatiinnarneqartut. Kalaallit Danmarkimi Illuutaanni pisiniarfiit aamma matoqqassapput.
Kalaallit inuuniarnermikkut ajornartorsiutilinnut ornigulluni sullissinerit aamma taamaatinneqarallarput, imigassamillu atornerluinermik ajornartorsiutilinnik katsorsaanerit, tarnip pissusaanik ilisimasalinnit sullissinerit, inatsisilerinermullu tunngasunut sullissinerit taamaatinneqarallartut. Kalaallit Danmarkimi Illuutaasa sisamat pisortaat KNR-imut taama ilisimatitsipput.
Efterskolertut ilinniartullu nunami allamiittut pillugit nalunaaruteqartoqarnissaa utaqqimaarneqartoq
Danmarkimi efterskolini atuartut nunatsinneersut Kalaallit Illutaanni ilinniartitaanermut immikkoortortanit atassuteqarfigineqarnialeruttorput.
Danmarkimi efterskolit sapaatit akunnerini marlunni matoqqassapput. Kalaallillu Danmarkimi efterskolertut angajoqqaarsiaminnut angerlassasut sisamanngornermi siunnersuutigineqarpoq. Aalborgimi Kalaallit Illuutaata pisortaa, Bo Albrechtsen taama ilisimatitsivoq.
- Efterskolertut angajoqqaarsiaminnukaqquneqassapput. Kalaallit Nunaanni suli tunillatsissimasoqanngimmat Danmarkimiiginnarnissaat siunnersuutigaarput.
Kisianni Danmarkimi Efterskolit Kattuaffiat naapertorlugu efterskolit atuartunut ilaquttaminnut angajoqqaarsiaminnulluunniit angerlarsinnaanngitsunut ammatinneqassapput.
AAMMA ATUARUK Ataatsimiititaliarsuaq: Danmarkimi pissutsit assingannik inissisimanngilagut
Kalaallit Illutaasali Namminersorlutik Oqartussanit, Danmarkimi efterskolertut nunatsinneersut pillugit ullumi sisamanngornermi ullaarngani ataatsimiittussanit, nalunaarfigineqarnissartik utaqqimaarpaat.
Københavnimi Kalaallit Illuutaat Danmarkimi ilinnilinniartunut ilinniartunut nunatsinneersunut nunami allami paasisassarsiorlutik angalasunut aamma akisussaasuuvoq. Ilinniartut taakkua apeqqutissaqarunik Københavnimi Kalaallit Illuutaannut saaffiginnissinnaapput.
- Danmarkimi ilinniartut nunatsinneersut akissutiserusuttut qaqugukkulluunniit sianerfigisinnaavaatigut, Københavnimi Kalaallit Illuutaata pisortaa, Leise Johnsen oqarpoq.
