Coronamik tuniluutsitsinaveersaarneq: Danmarkimi atuarfeqarfiit suliffeqarfiillu matusut

Danmarkimi pisortat suliffeqarfiini sulisut, upalungaarsimanermik suliaqanngitsut tamarmik ulluni 14-ini angerlarsimaannaqquneqarput.

Ministeriuneq, Mette Frederiksen (S) tusagassiortunik danskit nalunaaqutaat naapertorlugu pingasunngornermi unnukkut katersortitsinermi oqarpoq.

AAMMA ATUARUK Danmarkimi coronavirus pissutigalugu malittarisassat nutaat: Inuit 100-init amerlanerusut ataatsimooqqusaajunnaartut

Utoqqormiuni, peqqinnissaqarfinni politiinilu sulisut suliinnassapput.

- Ilissi pisariaqartippassi, ministeriuneq oqarpoq.

Danmarkimi pisortat suliffeqarfiutaani sulisut angerlarsinneqartut akissarsiaqartinneqassapput.

Atuartut, ilinniartut ilinniartitsisullu angerlartinneqartut

Aamma atuarfeqarfiit ilinniartoqarfiit tamarmik tallimanngorpamiit ataasinngorpamiilluunniit ulluni 14-iniugallartumik matoqqatinneqassapput. Tamanna coronavirusip tuniluunneranik annikillisaaniarneruvoq.

- Ilaqutariit tamarmik aqaguminngaanniit meeqqaminnik angerlarsimatitsiinnarsinnaasut angerlarsimaannartitsinissaat kaammattuutigaara, Mette Frederiksen oqarpoq.

Taassuma suliffeqarfiit namminersortut tamarmik sulisuminnik angerlarsimaffinniit suliinnartitsinissaat aamma kaammattuutigaa.

AAMMA ATUARUK Ataatsimiititaliarsuaq: Inuit pingasut coronavirusimik tunillatsissimasinnaasut

Ilinniarfeqarfinni ingerlaqqiffiusuni ilinnairtut suli ilinniarput angerlarsimaffimminniillu ilinniagartik ingerlallugu. Ilinniarnermusianik SU-nik akissarsiaqartitsineq allannguuteqanngilaq.

Innuttaasut uivinnginnissaat pingaaruteqartoq Mette Frederiksenip naqissuserpaa.

- Pisiniarfinnut pisiniarsinnaassaagut, nioqqutissiortoqarsinnaassaaq, assartuisoqarlunilu aamma tunisaqartoqassaaq.

- Iffianik equutissianilluunniit eqqanaarsarluarnissaq pisariaqanngilaq, ministeriuneq oqarpoq.

Danmarkimi tunillatsissimasut pisortatigoortumik ilisimaneqartut danskit nalunaaqutaat naapertorlugu pingasunngornermi unnukkut 514-iupput. Tamanna ataasinngornermiit quleriaateriaataat sinnerlugu amerlanerupput.