Naalakkersuisut innuttaasut tusarniartarniarpaat
Piffissamilu kingullermi oqallisaaqisumut, taamaalillutik Naalakkersuisut ilanngupput.
Inuit pisinnaatitaaffiinik ilisimatuup, Sara Bjørn Aaenip nalunaarusiani ippassaq saqqummiuppaa, ilaatigut Nunatsinni aatsitassarsiornermut atatillugu inuiaqatigiinnut tusarniaatitseriaatsit Aatsitassanut Pisortaqarfimmit pilersaarusiorneqaratik, arlaannaannut attuumassuteqanngitsunit ingerlanneqartariaqartoq.
Taama siunnersuuteqarneq tusaanngitsuusaaginnarneqarsinnaanngitsoq, Ove Karl Berthelsen oqarpoq.
- Aammalu pitsaassutsinik assigiinngitsunik immikkut soqutigisat aallaavigalugit misissuinissamut nalilersuinissamullu immikkoortortani assigiinngitsuni siammartitsinitta kingunerissappassuk, suliap pitsaasumik aammalu tatiginassuseqartumik ingerlannissaanut qaffassaataassappata, taamaalilluta taannaannarluunniit angussagaluarutsigu annertuumik alloriarnermik pilersitsissaagut, Ove Karl Berthelsen KNR-imut oqarpoq.
Sara Aaenip nalunaarusuiamini siunnersuutigaa, Aatsitassanut Pisortaqarfimmit suliarineqartartut tassaasut, ingerlatsivissuit qinnuteqarnerannut akuersisarneq, inuiaqatigiit tusarniarneqarnerannut pilersaarusiornerit aammalu avatangiisinik misissuinerit suliakkiutigisartagaasa allanut suliakkiutigineqartarnissaat. Tamatumalu Inatsisartuni eqqartorneqarnissaa, Ove Karl Berthelsenip oqaatigaa.
- Avatangiisinut, sillimaniarnermut, siunnersorneqartarnermut nalilersuisinnaatitaanermullu tunngasut, Inatsisartut upernaamut ataatsimiinneranni angumerisinnaannginnatsigit tamanna ukiamut ataatsimiinnermi eqqartorneqartussatut siunnersuutissagut maanna piareersaleruttarpuvut, Ove Karl Berthelsen oqarpoq.
Ingerlatsivissuit Nunatsinni aatsitassarsiorniarlutik soqutiginninnerat pillugu Nunatsinni maannakkorpiaq oqallisaalernera qutsatigalugu, Ove Karl Berthelsenip oqaatigaa.
- Assorujussuaq taanna iluatinnarpoq aammami tamatuma kingunerisarmagu qanorluunniit isuma arlaatigut immikkuullaritsigigaluaraangat arlaannut inissiffissaqartarmat, pitsaanerulersitsinissamullu aqqutissamik tunngaviliisinnaalluni, Aatsitassaqarnermut Naalakkersuisoq, Ove Karl Berthelsen taama oqarpoq.
Innuttaasut peqataatinneruneqarnissaannut atatillugu, Namminersorlutik Oqartussat, kommunit susassaqartullu allat peqataaffigisaannik suleqatigiissitamik pilersitsisoqarnissaa, Naalakkersuisunit siunniunneqarportaaq.
