Naalakkersuisut innarluutilinnut politikkiat inuit innarluutillit illersuisuata isornartorsioraa
Tassunga taarsiullugu misissorneqassaaq innarluutilinnut atugassarititaasut isumaqatigiissummut naapertuuttut ta malinneqarnissaannik neriorsuutai sutigut kinguaattooqqanersut.
Tamannalu Inuit Innarluutillit illersuisuata isornartoqartippaa.
Isumaqatigissutip malinneqarnissaanut iliuusissamik qulakkeerinnittoqarnissaa pillugu Inuit Ataqatigiit siunnersuuteqarput, taanna kingusinnerpaamik aappaagu ukiakkut suliarineqassaaq.
Siunnersuut inatsisartuni illuatungiliuttunit tapersersorneqarpoq.
Naalakkersuisulli isumaqarput inuit innarluutillit pillugit inatsisip sivisuumik utaqqineqartup atuutilerluni atorneqarnera utaqqeqqaartariaqartoq. Tamatuma kingorna inuit innarluutillit pillugit suliaqarfimmi pissutsit tamakkiinerusumik paasiniarneqassapput.
AAMMA ATUARUK Innarluutilinnut inatsisip utaqqisinneqarnera akilersinnaalluarpoq
Taamaammat inuit innarluutillit pillugit isumaqatigiissummut tunngatillugu sutigut amigaateqartoqarnersoq pillugu nassuiaasiortoqarnissaa Naalakkersuisut siunnersuutigaat. Nassuiaat ukioq 2023-mi naammassineqartussat.
Tamannalu Inuit Innarluutillit illersuisuanit, Christina Johnsenimit isorineqarpoq pimoorussinerunngitsorlu taanna isumaqarpoq
- Tassa paasiuminaatsittorujussuuara una siunnersuutigineqartoq siumut isigisoq, pilersaarusiornissamut takorluuisoq mumisinneqartoq kingumut isigisumut siunnersuuteqalernissaannut taanna paasiuminaatsilaarpara assigiinngilluinnarput taakku pineqartut. Isumaqarpunga piffissanngortoq siumut isigileqqinnissaq, pilersaarusioqqinnissaq. Ukua misissuinerit pisussaapput.
Siumut isigisoqassasoq
Allannguutissatut siunnersuut Demokraatinit taperserneqarpoq, iliuusissallu pillugit pilersaarusiorani nassuiaasiortoqarnissaanut taamaalilluni amerlanerussuteqartoqalerpoq.
Inuit innarluutillit illersuisoqarfiup Tilioq-p allannguutissaq paasisinnaanngilaa sooq misissuisoqassanersoq pilersaarusiortoqaranilu. Taamaammat Christina Johnsenip allannguutaasoq nuannarivallaanngilaa
- Naluara aamma tupigilaarpara sooq siumut isigaluta pilersaarusiornissaq soorlulusooq qunugineqartoq imaluunniit sunarpiaq pissutaanersoq naluara.
Siunnersuut Inatsisartut Ilaqutariinnermut Peqqissutsimullu ataatsimiititaliaannut ingerlateqqinneqarpoq.
AAMMA ATUARUK Nunatsinni innarluutillit atugaat kommuninit arlalinnit isornartorsiorneqarput
