Naalakkersuisut: Ilinniartoqarneq akikinnersiuinermit pingaarnerussaaq

Nunatsinni sanaartortoqassatillugu suliffeqarfiillu neqeroornerisa kingorna, akikinnersiuisarneq qimanniarneqarpoq, taamaaliornikkut sanaartorfinni ilinniartunik amerlanernik sulisoqalersinnaanera aammalu Nunatta aningaasaqarneranut tamanna iluaqutaasussaasoq oqaatigineqarluni.

Tamanna ima paasineqassaaq: Pisortaqarfiit akiligaannik sanaartortitsiniarnerni sullissisussarsiornermilu akikinnerpaaq qinerneqartassanngilaq, avatangiisilli mianerineqarnissaat aammalu sullivinni ilinniartoqartarnissaa pingaartinneqarnerusalissalluni. Taama siunnersuutiteqarput Naalakkersuisut. Tamannalu ippassaq Inatsisartuni siullermeerlugu oqallisigineqarmat, partiinit tamarmiunsunit taperserneqarpoq.

- Inatsisissap allanngortinnerani Naalakkersuisuni siunnersuutigaarput, sorpassuit allat pingaarutillit aamma ilaatinneqassasut. Soorlu ilinniartitaanermut periutsit qanoq issanersut, ilinniartut qassit sanaartornerup iluani atorneqassanersut, kingornalu ilinniartut qassit atorneqartarumaarnersut inuiaqatigiinnilu iluaqutaasinnaasut allat suut neqeroorummi ilaatinneqartassanersut siunnersuutitsinni pingaartippavut, Ineqarnermut Naalakkersuisoq, Jens B. Frederiksen taama oqarpoq.

Taassuma saqqummiinermini, sanaartornermi neqerooruteqartarneq pillugu Inatsisartut inatsisaata allanngortinneqarnissaa inassutigaa. Tamannalu partiinit tamarmiusunit ilalerneqarpoq.

- Toqqaannartumik aningaasartaqanngitsumik iliuuseqarniarpugut. Pingaartilluinnarparput suliffeqarfiit neqeroornerminni ilinniartut qassit sulisoriumaarnerlugit neqeroorummi ilaatippatigit. Taamaaliornikkut siunissami suliffeqarfinni ilinniartut amerlatsisarniarlutigit.

Naak Jens B. Frederiksenip siunnersuutaa partiinit tamanit ilalerneqaraluartoq, inatsisissap allangortinneqarnerani qanoq tamanna atuutsinneqassanersoq ilaatigut apeqquserneqarpoq, tassami akinik akikinnersiuisarneq sullissisussanit unammillernermik kinguneqarunnaarpat, oqimaalutaanermi suut pingaartinneqarnerusalissanersut, Atassummit apeqquserneqarpoq.

- Assersuutigalugu suliffeqarfiit marluk suliamut neqeroorput. Aappaata avatangiisit pingaartinnerullugit neqeroorpoq aappaatalu ilinniartoqarneq pingaartillugu. Taakkulu aningaasanngoraanni kikkut sullissisussatut qinerneqartassanersut paaserusutatsinnut ilaavoq, Knud Kristiansen oqarpoq.

Tamatumunnga Ineqarnermut Naalakkersuisoq ima akivoq:

- Naalakkersuisunit pingaartipparput oqimaalutaaneq pitsaaneq nassaarineqartassasoq. Ima paasineqassanngilaq sullissisussarsiornermi akisunerujussuaq ujartortassagipput. Ilinniartoqarnissaq imaluunniit avatangiisinut tunngasut pingaartinneqarnerusimappata taava ajoriffissaqartinngilarput sanaartugassap akikinnerulaarsinnaanissaa, Ineqarnermut Naalakkesuisoq Jens B. Frederiksen taama oqarpoq.

Sanaartornermut Avatangiisinullu ataatsimiititaliap inatsisissatut siunnersuut oqallisigereerpassuk, allannguutissaq aappassaaneerlugu Inatsisartuni oktobarip 20-ani oqallisigineqassaaq.