Naalakkersuisut assoralisimaartut: Atassut politikkikkut talerperliit pingaartitaannik sulileqqinniarpoq
Múte B. Egedep (IA) Naalakkersuisunik nutaanik saqqummiineranit qaammatit arfineq-pingasut qaangiupput.
Taamaakkaluartorli pingajussaanik naalakkersuisoqatigiinni nikititerereerpoq, Atassutillu naalakkersuisoqatigiinnut ikorfartuinini maanna aamma unitsippaa.
AAMMA ATUARUK Atassut Naalakkersuisunut ikorfartuiunnaartoq
Atassutip siulittaasuata, Aqqalu Jerimiassenip Atassutip kiffaanngissuseqarnerunissaa partiilu talerperliit pingaartitaannik sulilissammat, Naalakkersuisunut ikorfartortaajunnaarneranut aalajangernermut pissutaasut KNR-imut nassuiaatigaa:
- Uagut nammineq oqariartuutitsinnik saqqummiussinissatsinnut talerperliunerusumillu politikkeqarnerput oqaluuseriniarutsigu, tamanna ukiuni kingullermi 20-mi saqqumisimanngitsoq ikorfartortaajunnaarnitsinnut iluaqutaasinnavoq, Aqqalu Jerimiassen oqarpoq.
Atassullu Demokraatit qaninnerusumik suleqatigilerusukkai Inatsisartunilu talerperliunerusunik pilersitserusuttoq Aqqalu Jerimiassenip aamma oqaatigaa.
Aqqalu Jerimiassen: Assigiinngissutsit naggataani ersarippallaalerput
Atassutilli naalakkersuisoqatigiinnut ikorfartortaajunnaarnera Naalakkersuisoqatigiit anorersuarsiorseqqilersillugillu amerlanerussuteqaqqalaaginnarsilerpai. Tamatuma saniatigut Atassutip inatsisartuni taasisoqarnerani tapersersuinissaa naatsorsuutigineqarsinnaajunnaarpoq.
Aqqalu Jerimiassenip oqarnera naapertorlugu Atassutip IA-mik Naleqqamillu suleqatiginninnini annikitsuinnarmik pissarsiaqarfigaa, taamaammat partii maanna talerperliunerusut politikkiannik pingaartitsinerulerniarpoq.
- Assigiinngissutsit naggataani ersarippallaalerput. Naalakkersuisut saamerliuinerusumik eqqarsartariaaseqarnerat ataqqivara, kisianni uanga Atassut talerperliunerusutut partiitut atulerseqqikkusuppara.
Suliaq aallartitsissutaasoq
Aqqalu Jerimiassenip suliaq akeqanngitsumik ajunngitsorsiassanut tunngasoq Atassutip naalakkersuisoqatigiillu assigiinngitsumik isiginniffigigaat oqaatigaa.
Suliaq taanna Inatsisartuni oqallisigineqarmat Aqqalu Jerimiassen naalakkersuisoqatigiit suliffeqarfiit sulisuminnut akeqanngitsumik ajunngitsorsiaqartitsissutigisartagaannut akileraartitsisalernissamik siunnersuuteqarnerannik taperseeqqaaraluartoq malugineqarsinnaavoq. Taassumali isumaa allanngoriataarpoq, partiilu mumisitsilluni akerliulerpoq.
AAMMA ATUARUK Atassutip ajunngitsorsianut akileraarnissaq itigartitsissutigaa: Utoqqatsissuteqareerpunga
Aqqalu Jerimiassen KNR-imut taamani oqarpoq:
- Eqqarsarluareerlunga uani ataatsimiitsitaliami atsioqataaninni misigigama uummatiga malissimanagu. Atassutip anguniagaanut assortortumik iliuuseqarsimallunga misigigama, uagut peqataaffigisinnaanngilarput.
Naalakkersuisut siulittaasuata, Múte Bourup Egedep Atassutip qinigaa ataqqillugu KNR-imut oqaatigaa:
- Politikkiminnik kiffaanngissuseqarnissaminnik qulakkeeriniarnerat kiisalu namminneq politikkiminnik ingerlatserusunnerat ataqqivara.
IA Nalerarlu ataatsimut 16-inik qinigaatitaqarput.
Illuatungiliuttut maannamut 13-inik qinigaatitaqaraluarput. Atassutillu naalakkersuisoqatigiinnut ikorfartortaajunnaarneratigut illuatungiliuttut Inatsisartuni 15-inik qinigaatitaqalerput.
