Naalakkersuisut akisussaaffik tigullugu iliuuseqarlik
Kujataani timmisartuussisarneq ukiorpanni qulimiguulitoqqamik S-61-imik ingerlanneqarsimavoq, ukiorpassuarnilu tamanna ajornartorsiutitaqanngitsumik ingerlasimalluni. Taartaali Bell 212 taamaaqqajanngilaq, timmisartuussinissammi kinguaattoorfiusut unitsitsiinnarnerit amerlasimaqaat.
Oqartussaasut tungaannit Kommuni Kujallermi innuttaasunut sumiiffimmit sumiiffimmut timmisartuussinermut tunngatillugu ajorseriartoqannginnissaa neriorsuutigineqarpoq. Piviusorli allarluinnaavoq. Qulimiguulik atorneqalersoq siulianut naleqqiullugu mikineruvoq ilaasorisinnaasaalu ikinnerullutik. Aammattaaq Bell 212 sila unerisimanngitsillugu pitsaanerpaajunngilaq, 2013-imi ullut siulliit 14-it qaangiunnerini tamanna Kujataani malugineqareersimavoq. Uffa taqqavani anorersuarsimanngikkaluarpoq.
-Nuuk, Sisimiut imaluunniit Ilulissat qulimiguulinnit mikisunit taakkunannga qulingiluaannarnik ilaasoqarsinnaasunik nassiussanillu ikittuinnarnik nassataqarsinnaasunik sullinneqaleraluarpata ila qinikkat qassimmita pissutsit akuersaarsinnaannagit nilliassagaluarpat. Kujataali pineqarmat nuna tamakkerlugu qinikkat ikittuinnaat tutsiuttarput, Naalakkersuisullu Air Greenlandimut isumaqatigiissut kisiat patsisiliullugu toqqorterput, Simon Simonsen, pissutsinik nutaanik qatsussisimaqaluni oqarpoq.
Kujataata immikkut pineqarneranik aatsaat misigisimasoqanngilaq. Qaqortumi mittarfiliornissaq oqallisaasupilussuusimavoq, tamatumanilu illoqarfiup mittarfittaartinnissaa pillugu aalajangiiniarneq paamaarunneqarsimalluni.
- Kujataata inuussutissarsiornikkut ineriartortussanngoraluarnera massakkut angallannikkut pissutsit pissutigalugit qatangiinnaratarsinnaavoq. Ilami kikkut aatsitassarsiornermut millionilikkaanik aningaasaliiumassagamik orninniakkamut apuunneq ajornarpat. Kujataa Naalakkersuisunit nunatta sinneranut sanilliullugu tunulliunneqartuaannarsinnaanngilaq. Qularinngivippara politikerit sorliit Kujataani angallannikkut pissutsinik ilungersuutiginnissimanersut kikkullu ilungersuutiginnissimannginnersut Inatsisartunut qinersinissami kujataamiunit qinersisartunit eqqaaneqarumaartut, borgmester Simon Simonsen neriorsuivoq.
