Naalakkersuisut Air Greenlandip piginneqataanerunissaanut pilersaaruteqanngillat
Pele Brobergip paragraf 37 aqqutigalugu Kim Kielsen qinnuigaa Air Greenlandimi piginneqataassutsit SAS-imit naalagaaffimmiillu Naalakkersuisunit pisiarineqarnissaat pillugu pilersaarutinik nassuiaateqassasoq.
- Namminersorlutik Oqartussat Air Greenlandimi aktianik pisinerat pisinnginneralluunniit isumaqatigiissummi eqqaaneqanngilaq. Tamannali isumaqatigiissummi aamma ilaatinneqanngilaq. Kim Kielsen akissuteqaatimini taama allappoq.
Ilanngullugu Kim Kielsenip ilisimatitsissutigaa, ministeriunermik ukioq manna februaarimi marsimilu ataatsimeeqateqarnermini Air Greenland A/S-mi piginnittuunermut aaqqissuussinerup ilusaa pillugu apeqqut oqaloqatigiinnerni ilaatinneqanngitsoq.
AAMMA ATUARUK Mittarfiit pillugit isumaqatigiissusiortoqarnera Sermersuumi nuannaarutigineqartoq
Naalakkersuisut tapersersortaasalu Demokraatit piginnittuussutsip annertusinerunissaannut uani qinigaaffiup iluani isumaqatigiissuteqarnikuunersut ilanngullugu Pele Brobergip apeqquteqarfigaa.
Taama aalajangertoqarsimanngitsoq, Kim Kielsen allappoq.
"Air Greenland A/S-mi naalagaaffiup SAS-illu aktiaataannik Namminersorlutik Oqartussat - toqqaannartumik toqqaannanngitsumilluunniit - tigusinissaat Naalakkersuisut innersuussutigissappassuk tamanna Inatsisartut Aningasaqamermut Akileraartamermullu ataatsimiititaliaannut saqqummiunneqarumaarpoq. Tassunga uiggiullugu innersuussummik taamaattumik Inatsisartut Aningasaqarnermut Akileraartamermullu ataatsimiititaliap suliaqarnissaanut Air Greenland A/S-mi naalagaaffiup SAS-illu aktiaataannik tigusinissap naammassinissaanut Naalakkersuisut piginnaatitaanersut aalajangiisuussaaq." Kim Kielsen taama allappoq.
