Mittarfiit pillugit isumaqatigiissusiortoqarnera Sermersuumi nuannaarutigineqartoq
- Nuannaaqaagut, isumaqarpugut angusaq kusanartuusoq, massakkut periarfissinneqartussanngorpugut, mittarfiit tallinerisigut takornariaqarnikkut inuussutissarsiornikkullu siuarsaaqqinnissatsinnut - tassuunakkut Nunatsinni isertitat amerlanerulissapput, Kommuneqarfik Sermersuup borgmesteria Asii Chemnitz Narup taama oqarpoq
AAMMA ATUARUK Løkke Nuummi Ilulissanilu mittarfinnik piginneqataarusuttoq
Mittarfissat aningaasalersorneqarnissaat saqqummiunneqarmatali Partii Naleqqameersut isumaqataanatik sapaatiummat naalakkersuisooqataajunnaarput, Naalakkersuisut siulittaasuata statsministerillu ataasinngornermi ataatsimiinnerisa nalaani akerliussutsimik takutitsisoqarpoq. Tamannalu borgmesterip qanoq isumaqarfigineraa aperaarput:
- Tassunga killinnermut Naalakkersuisut siulittaasuata suleriaaserisimasaa ilisimaqarfiginngilara naalakkersuisuniinnginnama, taamaattoq isumaqarpunga toqqisisimanartua uaniippoq, tassa Kim Kielsenip erseqqissumik oqaatigimmagu, isumaqatigiissut massakkut Inatsisartuni peqqissaartumik nalilersorneqassasoq, taamaattumik Inatsisartuutitavut tatigivagut, Kommuneqarfik Sermersuup borgmesteria Asii Chemnitz Narup taama oqarpoq.