Naalakkersuisut aalisartunut ikiorsiissutit isumaliutigeqqikkaat
Aalisartut tulaassuiunnaarnissamik aarlerisaarinerisa kingorna tamanna pivoq.
Sinerissap qanittuani aalisartunut ikiorsiissutit ukiup nikinnerani atorunnaarput.
Kisianni coronamik ajornatorsiornerannit aalisartut aningaasaqarnikkut eqqugaasut, KNAPK-ip siulitaasua Henrik Sandgreen marlunngornermi oqarpoq.
Nuummi Royal Greenlandip tunisassiorfiani saarullik niaqoqanngitsoq siorna decembarimi kilomut 11 koruuneqartoq ullumikkut 6,25 koruuneqarpoq
Taamaattumik Naalakkersuisut aalisartunut ikiorsiissutitik ukiortaap kingorna siivitsussagaat, KNAPK-ip piumasaraa.
Taama pisoqanngippat aalisartut umiarsulivimmi talinngaannarnissamik KNAPK-ip siulitaasua Henrik Sandgreen marlunngornermi kaammaattuuteqarpoq.
- Ikiorumaneqanngikkussi aammalu naleqanngitsutut isigineqaannarussi taava periarfissaq ataasiinnaavoq tassalu: Umiarsualivimmi talinngaannarutta taava aningaasarsiorneq tamarmi univippat aatsaat ikiorserniarneqalissaagut, Henrik Sandgreen oqarpoq.
AAMMA ATUARUK KNAPK raser: Vi opfordrer til strejke, hvis hjælpepakken stopper
Kisianni aalisarnermut naalakkersuisup aalisartunut ikiorsiissutit ukiumi nutaami ingerlaannassanersut ukioq naanngitsorli isumaliutigilereersimallugit maanna allappoq.
Taamaatumik aningaasaqarnermut naalakkersuisoq Vittus Qujaukitsoq suleqatigalugu ikiorsiissutit ingerlaannaannissaanut tunngavissaqarnersoq misissuissusanik suleqatigiissitamik pilersitsivoq.
- Tassunga atatillugu suleqatigiissitami ilaasortaasimasut decembarip 30-anni 2020-mi saaffigineqareerput tassungalu ilanngullugu KNAPK nalunaareerpoq suleqatigiissitami peqataaqqissalluni, Jens Immanuelsen (S) taama oqarpoq.
Taamaattummik KNAPK-p ilaasortaminut aalisarumajunnaartoqarnissamik kaammattuinera Jens Immanuelsenip tupigivaa.
- KNAPK allatut isummersimassappat, tamanna pillugu ilisimatinneqarsimanngilagut, Jens Immanuelsen naggasiilluni oqaaseqarpoq.
2020-mi suleqatigiissitaq ukunannga ilaasortaaffigineqarpoq: Aalisarnermut, Piniarnermut Nunalerinermullu Naalakkersuisoqarfik, Aningaasaqarnermut Akileraartarnermullu Naalakkersuisoqarfik, KNAPK, Sulisitsisut, aamma Aatsitassanut Inuussutissarsiornermullu Naalakkersuisoqarfik.
