Naalakkersuisut aalisarnermik sukaterisut

Sinerissap qanittuani qaleralittassat killilerneqarmata, avataasiorlutik qaleralinniartut tatineqarnerat oqiliimisoq piujuartitsilluni aalisarnissamik suliniaqatigiiffk Pinngortitaleriffillu isumaqarput.
Sinerissap qanittuani pisassiiviunngitsuni pisaasartut avataani pisaasartunut maannamut ilaatinneqartarsimapput.
decembarip 12-at 2020 11:35

Naalakkersuisut sinerissap qanittuani killilersugaanngitsumik qaleralinniarneq taamatippaat. Tamanna siusinnerusukkut killeqanngitsumik qaleralinniarfiusuni, ilaatigut nunatta kitaani Qeqertarsuup Tunuata kujataani pivoq.

Naalakkersuisulli sinerissap qanittuani qaleralinniarneq tamaat decembarip qulinganiit aqutsiveqarfinngortippaat, taamaalilluni pisassaqaraanni aatsaat aalisartoqarsinnaalerpoq.

Tamanna piujuartitsilluni aalisarnissamik suliniaqatigiiffimmi, nunatsinni aalisarnermut attuumassutilippassuarnit ilaasortaaffigineqartumi, Sustainable Fisheries Greenland -imi siulittaasup nuannaarutigaa.

- Kalaallit Nunaata kitaani sinerissap qanittuani qaleralinniarfiit aqutsiveqarfinngortinneqarneri naammagisimaartorujussuuarput. Qeqertarsuummi Tunuata kujataani ukiuni kingullerni aalisartoqaqimmat, Lisbeth Schönemann-Paul KNR-imut oqarpoq.

Sinerissap qanittuani aqutsiveqarfinngortuni qaleralittaasartut 2017-imiit 2019-imut ataani takukkit.

Assi © : Naalakkersuisut

Tusarfik: Naalakkersuisut.

Avalaqqinneq ajortut

Pinngortitaleriffimmi aalisakkanut qalerualinnullu immikkoortortaqarfimmi pisortaq, Helle Siegstad, naapertorlugu qalerallit avataanit sinerissap qanittuanukaraagamik avalaqqinneq ajorput.

Sinerissap qanittuani pisassiiviunngitsuni pisaasartut avataani pisaasartunut maannamut ilaatinneqartarsimapput.

- Tamanna qalerallit amerliartornissaat eqqarsaatigalugu isumaqanngilaq, qalerallit sinerissamut qanittumut pigaangamik avataanukaqqinneq ajormata. Helle Siegstad KNR-imut oqarpoq.

AAMMA ATUARUK Naalakkersusiut qaleralinniarfiit aqutsiviunngitsut atorunnaarsikkaat

Maannakkulli immikkoortinneqalerput. Tamannalu aalisartunut MSC-millu ilisarnaasersuinermut iluaqutaassaaq.

- Avataani aalisarnermi MSC-qarnermut piumasaqaatit naammassisinnalerpagut. Taamaalillutalu sinerissap qanittuani aalisarneq aqutaasumik ingerlassinnaalerlutigu, tamanna sinerissap qanittuani avataanilu aalisarnermut ajunngitsuuvoq, Lisbeth Schönemann-Paul oqarpoq.

Nunatta kitaata avataani qaleralinniarneq 2017-imiit MSC-mik meqqilersugaavoq.