Naalakkersuisussat ullumi ilisaritinneqassagunarput
Naalakkersuisoqatigiilersussat partiit tassaasut Siumut, Atassut aamma Partii Inuit ulluni kingullerni naalakkersuisoqatigiinnissaminnut tunngavissatik isumaqatigiinniutigaat. Isumaqatigiinniutigineqarunartullu tassaagunarput aatsitassat uranitaqanngilluinnarnissaannik politikkip atorunnaarsinneqarnissaanut tunngasut, aalisarnermut politikki kiisalu suliniutinut angisuunut inatsisip nalilersuiffigeqqinnissaa.
Qiningaanerup misilinneqarnissaanut ataatsimiititaliaagallartut ullaap tungaa aamma ataatsimiipput. Ataatsimiititaliaagallartumilu ilaasortat tassaapput, Lars Emil Johansen, Siumut, Siverth K. Heilmann, Atassut, Nikku Olsen, Partii Inuit, Kuupik V.Kleist, Inuit Ataqatigiit aamma Jens B. Frederiksen Demokraatit nalilersuissapput Inatsisartunut qinigaasut pinerluuteqarsimallutik akiligassinneqarsimasut imaluunniit pineqaatissinneqarsimasut inatsisartunut ilaasortanngornissaminnut naleqqukkunnaarsimanersut inassuteqaateqassapput.
Aleqa Hammondimullu pingaaruteqarpoq, Naalakkersuisunut ilaasortassat saqqummiutinnginnerini ataatsimiititaliaagallartup inassuteqaateqarsimanissaa, tassami Naalakkersuisunut ilaasortassatut qinikkat qinigaasinnaanermut ataatsimiititaliamit qinigaasinnaaneri misilinneqaratarsinnaammata.