Naalakkersuisup corona pillugu malittarisassat nutaat paatsuunganarneri nassuerutigigaa
Peqqissutsimut Naalakkersuisoqarfik sapaatip akunnerata siuliani suliassarpaaloqarpoq. Naalakkersuisummi katerittarneq pillugu malittarisassaagallartut pillugit nalunaarut nutaaq marlunngornermi juunip ulluisa 16-ianni saqqummersippaat.
Malittarisassalli ulluni sisamani atuupput, malittarisassammi nutaat pillugit nalunaarut nutaaq tallimanngornermi juunip ulluisa 19-ianni saqqummersinneqarpoq.
Peqqissutsimut naalakkersuisup, Anna Wangenheimip (D) oqarnera naapertorlugu nalunaarut siulleq paasiuminaassimavoq.
- Qisuariartorpassuit tusarniarsimavagut, taakkulu tunngavigalugit taama eqaallisaarnerulaartumik torernerusumillu atuutsilertussamik sanasariaqalersimanerput tunngaviginerpaavarput, Anna Wangenheim KNR-imut oqarpoq.
AAMMA ATUARUK Corona pillugu malittarisassat erseqqissaatigineqartut: Katittut sukannersumik killilersuiffiusariaqanngitsut
Nalunaarummi siullermi aaqqissuussinerni ’sumiiffinnit’ assigiinngitsunit peqataasussanik qaaqqusisoqarnissaa siunertarineqarpat amerlanerpaamik 30-t kisimik peqataasinnaasut allassimavoq.
Oqaaserli atorneqartoq ’sumiiffiit’ ersarissumik nassuiaatigineqaranilu ilaatinneqanngitsut allassimanngillat.
Nalunaarut ‘paasiuminarsarneqartoq’
Namminerli aaqqissuussinerit – assersuutigalugu katittut apersortittullu kommuninit assigiinngitsuneersunit peqataaffigineqartunut atatillugu ilaatinneqanngitsut maanna erseqqissaatigineqarpoq. Aaqqissuussinerimmi allat tamarmik sumiiffigisaneertunit kisimi peqataaffigineqarsinnaapput.
- Malittarisassat paasilluarneqarniassammata piuminarsarneqarput, Anne Wangenheim.
Nalunaarulli siulleq paatsuunganarpat qanoq ililluni saqqummersinneqarsinnaava? Peqqissutsimut Naalakkersuisoqarfimmi atuaqqissaarneqaqqaannginnami?
- Tamanna soorunami eqqoriaannarsinnaavarput, nunattali ammaqqikkiartuaarnerata immikkoortuata siulliani piffissaliussat sivikitsut naapertorlugit sulivugut, inuppassuillu eqqarsaatigalugit imaannaanngeqisunik aalajangigaqartarluta.
- Taamaammat nalunaarutip paasiuminartunngorlugulu atorneqarsinnaaqqullugu eqaannerusumik sulisariaqarsimavugut, Anna Wangenheim oqarpoq.
Attaveqatigiinnerup pitsaanerunissaa kissaatigineqartoq
KNR-ip Anna Wangenheim nalunaarutip siulliup imarisaa pillugu sapaatip-akunnera kingulleq tamaat apeqquteqarfiginiarlugu apersorniarsarigaluarpaa.
AAMMA ATUARUK Katerinnissamut malittarisassat nutaat inuiattut ullorsiornermi atulissasut
Peqqissutsimut naalakkersuisoq apeqqutinut akissuteqarnissaminut piffissaqanngitsoq matumani akissutigineqarpoq. Anna Wangenheimillu oqarnera naapertorlugu oqaaseqarnissaminut malittarisassat iluminni inissilluaqqaartariaqarnerat nipangersimanerminut pissutaavoq.
- Erseqqissumik oqaaseqannginnitsinni nalunaarummik paatsuugassaanngitsumik saqqummiinissarput qulakkeeqqaarusukkatsigu oqaaseqarusunngikkallarpunga. Taamaaliunngikkuma uitsannerusoqaliinnarsinnaammat. Allanngortitsivugut, inaarsarnissaanulli periarfissanik eqqartueqqaartariaqarpugut, Anna Wangenheim.
Nalunaarutinut ukununnga tunngatillugu pitsaanerusumik iliuuseqarsinnaasimagaluartusi isumaqarpit?
- Ilutsinni suleriutsit assigiinngitsorparujussuit massakkut ingerlasut inuiaqatigiinnut toqqissisimasumik aamma torersumik nittarsaanneqartarnissaat soorunami sulissutigiuassavarput, Anna Wangenheim oqarpoq.