Corona pillugu malittarisassat erseqqissaatigineqartut: Katittut sukannersumik killilersuiffiusariaqanngitsut
Katinnissaminnut imaluunniit ilaquttanik apersortitsinissaminnut qaaqqusisimasut anersaajallassinnaalerput.
Namminerisamik aaqqissuussinerit coronap kingunerisaanik sukangasumik killilersuinernut ilaanngillat. Naalakkersuisut tamanna juunip ulluisa 19-ianni nalunaarummi nutaami nalunaarutigaat.
Matumani illup iluani silamilu aaqqissuussinerit kommuninit allanit angalasunit peqataaffigineqartussatut ’siunertaqartut’ ingerlanneqassanngitsut allassimavoq.
AAMMA ATUARUK Katerinnissamut malittarisassat nutaat inuiattut ullorsiornermi atulissasut
Matumanili inuuissiortitsinerit, katittut, apersortittut, kuisitsisut, soraarummeertut ilisinerillu ilaatinneqanngillat, aaqqissuussisulli peqataasut amerlassusaat allallu iliuusissat malinneqarnissaannut malittarisassat malissavaat.
- Inuiaqatigiinni aamma pingaartitatsinnut ilaalluinnarami ilaqutariittut katerisimaarnerit attanneqarnissaat,
- Maannamut isikkoqartillugu corona tuniluutinngilaq nunatsinni, inuiaqatigiinnilu ilaqutariittut katerisimaarnerit pingaartitatsinnut aamma ilaalluinnarami.
- Taamaammat ilaqutariittut ataatsimoornissaq uagutsinnut aamma pingaaruteqarpoq,
peqqissutsimut naalakkersuisoq, Anna Wangenheim (D), KNR-imut oqarpoq.
Tuniluuttoqaratarsinnaanera pinaveersaartinneqassasoq
Katerinnermut aaqqissuussinernillu ingerlatsinermut malittarisassat
Illup iluani aaqqissuussinerni qanillinaveersaarnissamut eqqiluisaarnissamullu malittarisassat malinneqarsinnaappata amerlanerpaamik 100-it peqataasinnaapput. Aaqqissuussisoq kommuninit allanit inunnik peqataanissamut kajumissaarissanngilaq.
Silami aaqqissuussinerni qanillinaveersaarnissamut eqqiluisaarnissamullu malittarisassat malinneqarsinnaappata amerlanerpaamik 250-it peqataasinnaapput. Aaqqissuussisorlu matumani kommuninit allanit inunnik peqataanissamut aamma kajumissaarissanngilaq
Katerinnissamut malittarisassat aggustip aallaqqaataata tungaanut atuupput.
Taassuma politikkip tungaanit aaqqissuussinerit annertuut soorlu timersornermi unamminerit tusarnaartitsinerillu inuit kommunit killeqarfii qaangerlugit angalaffigisartagaat pinaveersaarniarneqartoq nassuiaatigaa.
Taamaammat pisussat taamaattut tamarmik kommunimi ataatsimi innuttaasunuinnaq aaqqissuunneqassapput.
- Illoqarfinni mikinerusuni isorliunerusunilu coronap tuniluutilinnginnissaa piniarlugu taamatut sukaterisariaqarsimavugut, taakkununngami tuniluuttoqalissagaluaruni assorujussuaq ajalusoortutut inissisimalissagatta.
Naalakkersuisut nalunaarutaat nutaaq, Naalakkersuisut nittartakkaminni juunip ulluisa 16-ianni marlunngornermi saqqummersitaata paatsuungassutaasup kingorna saqqummersinneqarpoq.
Apeqqutit nassuiaatissaat amigaataasut
Nalunaarummi siullermi aaqqissuussinerni ’sumiiffinnit’ assigiinngitsunit peqataasussanik qaaqqusinermi amerlanerpaamik 30-t peqataasinnaasut allassimavoq.
Tamanna Kalaallit Nunaanni Arsartartut Kattuffiata nunatsinni pissartanngorniuunnissamik unitsitsiinnarneranik ilaatigut kinguneqarpoq.
Nalunaarummili ilaatinneqanngitsut assersuutigalugu katinnerit nalliuttoqarneranilluunniit allassimanngillat. Aammattaaq ’sumiiffiit’ assigiinngitsut suminngaanneernersut erseqqissumik allassimanngilaq.
AAMMA ATUARUK Arsaannermi GM taamaatinneqarpoq
KNR-ip assersuutigalugu apersortitsinermi qaaqqusat ilaat nunatsinni sumiiffinnit allaneerunik qaaqqusat 30-nnaasussaanersut akissutisiniarlugu Anna Wangenheim sapaatip-akunnerata siulia tamaat apersorniarsarigaluarpaa.
Peqqinnissamut naalakkersuisoq apeqqutinut akissuteqarnissaminut piffissaqanngitsoq matumani akissutigineqarpoq.
Nalunaarulli kingulleq patsuungatitsimmat nutaaq allanneqartoq maanna nassuiaatigaa.
- Qisuariartorpassuit tusarniarsimavagut, taakkulu tunngavigalugit taama eqaallisaarnerulaartumik torernerusumillu atuutsilertussamik sanasariaqalersimanerput tunngaviginerpaavarput, Anna Wangenheim oqarpoq.
