Naalakkersuisunngorlaaq ataatsimiittaqattaarlunilu suliniutinik nutaanik aallartitsinermik ulapittoq

Mariane Paviasen Jensen (IA) Meeqqanut, Inuusuttunut, Inatsisit Atuutsinneqarnerannut Naligiissitaanermullu Naalakkersuisutut qaammat ataaseq sulinermini suliassarpassuaqareerpoq.

Politikkikkut suliniutit pingaarutillit ulapputigisimavai.

Naalakkersuisutut akisussaaffii siammasipput, innuttaasunut pingaarutilinnik akisussaaffeqarluni, suliassaqarfik innuttaasunik ulluinnarni inuunerannut akisussaaffeqarlunilu sunniuteqartorujussuuvoq - meeqqat inuusuttullu angerlarsimaffiup avataanut inissinneqartarneranniit naartunaveersaasersuisimanermut tunngasut.

Toqqaannartumik oqaloqatiginninnerit

Suliassaqarfiup annertussusia pissutigalugu Naalakkersuisutut qaammat siulleq sulinera meeqqanut pisinnaatitaaffiit pillugit kattuffinnik kiisalu suliassat pillugit kattuffinnik arlalinnik peqateqarluni ataatsimiinnerpassuarnik imaqarpoq. 

Kattuffiit pilersinneqareersimasut saniatigut Naalakkersuisoq aamma ilungersuussilluartunik innuttaasunillu ataatsimeeqateqarsimavoq.

Qanittukkunni ulluunerani neqeroorutinut tunngatillugu akerliussutsimik takutitsisoqarpoq, Naalakkersuisorlu peqataasut ilaannik naapitaqarluni suut uummammiorineraat tusarnaarpoq.

- Suliassaqarfigisara pillugu ataatsimeeqatigerusullunga oqaloqatigerusullungalu annertuumik soqutigisaqartoqarsimanera nuannaarutigeqaara attortillungalu. Ajoraluartumik tamaasa angumerisinnaasimanngilakka, kisianni ataatsimiittarnerit suleqatigiinnerillu ingerlaqqinnissaat qilanaaraara, Meeqqanut, Inuusuttunut, Inatsisit Atuutsinneqarnerannut Naligiissitaanermullu Naalakkersuisoq Mariane Paviasen Jensen oqarpoq.

Upernaakkut ataatsimiinneq naalakkersuisunngorlaamut, Mariane Paviasen Jensenimut aamma ulapaarfiuvoq, taassuma naalakkersuisoqarfik   siammasissunik suliassarpassuaqarfiusoq pingaaruteqartorlu paasisaqarfigilluarniarsarivaa.

Suliassaqarfippassuit

Tamannali sulianik ingerlatsinermut unitsitsinngilaq. 

Naalakkersuisoq inissiisarnermut tunngatillugu suliassaqarfinni aningaasartuutinik misissueqqissaarinermut tunngatillugu tusagassiortunik katersortitsivoq, kommunillu suleqatigalugit inissiisarnermut suliassaqarfimmi suliniutit pillugit isumasioqatigiinnissanik arlalinnik pilersaarusiortoqarluni.

- Inissiisarnermut tunngatillugu suliassaqarfik Nunatsinnut tamarmut pingaaruteqartuuvoq. Suleqatigiilluta ataatsimoorlutalu kivitsisariaqarpugut. Taamaattumik suliassaqarfimmi suliniutinik ineriartortitsinermi kommunit Namminersorlutik Oqartussallu aallaqqaataaniit suleqatigiinnissaat pingaaruteqartorujussuartut isigivara, Meeqqanut, Inuusuttunut, Inatsisit Atuutsinneqarnerannut Naligiissitaanermullu Naalakkersuisoq oqarpoq.

Naalakkersuisoq Kommune Kujallermut taassuma saniatigut tikeraarpoq, suliassaqarfiit atorunnaarsinneqarallarsimasut pillugit borgmesteri ataatsimeeqatiginiarlugu.

Ataatsimiinneq pissarsiffiulluarsimavoq, siunissamilu pitsaasumik suleqatigiinnissamut tunngavissamik patajaatsumik pilersitsilluni.

Naak naalakkersuisutut sulinerup aallartinnerani ulappussimagaluaqisut akisussaassusermik  kajumisitsilersitsiniarluni imaqartoq, naalakkersuisup tusagassiorfinnut nalunaarummi oqaatigaa.

Naalakkersuisup suliassaqarfimmi tamarmi sulinissani qilanaaraa, akissaafferujussuarlu pingaaruteqartorlu tigusani pillugu tulluusimaarutigalugulu maniguuppoq.