Múte B. Egede: Aningaasaliinerit piviusunngortinneqartariaqarput
Inuussutissarsiornermi suliallit nunatsinni ataatsimeersuarnerisa annersaat Future Greenland marlunngornermi aallartissaaq.
Nunanut allanut, inuussutissarsiornermut aatsitassanullu naalakkersuisoq Múte B. Egede oqalugiartussanut ilaavoq.
- Qilanaarisara annerpaaq tassaavoq nunatta soqutigineqarnerani tunngassuteqartut timitalersuiffigineqarsinnaaneranut qanoq periarfissaq annertutiginersoq tusaassallugu soqutiginninneq annertusiartorpoq oqaluinnarnermiinnanili timitaliinermiittariaqartoq
aamma isumaqarfigaara taannalu qilanaaraara piumassuseqarfigineqarnersoq tusassallugu Múte B. Egede oqarpoq.
Naak nunarput nunanit tamalaanit soqutigineqaleriartuinnaraluartoq aningaasaliinissamut aningaasaliinissamut aporfiusinnaasunik suli peqartoq Sulisitsisut siusinnerusukkut oqaatiginikuuaat.
Naallu soqutiginnittoqarneruleriartornera Múte B. Egedep takusinnaagaluarlugu iliuuseqartoqarnissaa amigaatigaa.
- Soqutigineqartorujussuusugut ilisimavara, soqutiginninnerulli pitsaasumik malitseqarnissaa maqaasivara, taanna oqarpoq.
Aningaasaatillit Kalaallit Nunaanni aningaasaleerusussuseqarnersut ataatsimeersuarnerup massuma nalaani paasinarsisinnaanissaa naalakkersuisup taamaammat neriuutigaa.
- Soqutiginninneq annertuneruleriartorpoq, oqaasiinnartigulli piviusunngornavianngilaq; iliuuseqartoqartariaqarpoq piviusunngortitsisoqarlunilu. Taamaalisoqarsinnaanersorlu tusassallugu qilanaaraara.
- Pisariaqartutut naalakkersuisut isigigamikku inuiaqatigiinni ineriartornitta atugarissaarnittalu annertusarnissaa tassanilu inuussutissarsiornerup siuariartornissaa avaqqunneqarsinnaanngilaq.
Nunanut allanut tunngasut inuussutissarsiornerlu
Naalakkersuisut nutaat apriilimi ilisaritinneqarput, Múte B. Egede aningaasaqarnermut akileraartarnermullu naalakkersuisooreerluni naalakkersuisoqarfimmut allamut nuulluni.
Naalakkersuisut nutaat saniatigut inuussutissarsiornermut aatsitassanullu suliassaqarfiit nunanut allanut naalakkersuisoqarfiup ataanut inissinneqarput.
Nunatsinnut tamanna periarfissiilluarnerussasoq Múte B. Egede isumaqarpoq, naalakkersuisoq suliassaqarfiit pillugit ataatsimoorussamik oqaaseqarsinnaanngussalluni.
- Ullutsinni pisut pillugit ukiullu aggersut eqqarsaatigalugit, Múte B. Egede oqarpoq.
Naalakkersuisoqarfiit taakku kattunneqarnerat pillugu inuussutissarsiortunit nunaniillu allanit qanoq qisuariartoqarpa?
- Soqutigineqartoq maluginiarpara aammalu inuussutissarsiornerup silarsuaani nunatsinni malugisara tassaavoq pissangagineqarpoq qilanaarineqarlunilu nukiit taakkua kattunneqarnerat aammalu susassaqarfiit taamaalillutik taamatut kattunneqarneratigut qanoq pitsaanerusumik kingunissanik takusaqarnissaq qilanaarineqarpoq aammalu uagut naalakkersuisuninngaanniit qilanaaraarput suliassallu aggersut aamma ingerlannissaat timitalersuiffiginissaallu aamma suliariumallugit.
Piginnittuusussaaneq immikkullu akileraarusiineq
Takornariartitsisarneq pillugu inatsit nutaaq Inatsisartuni 2024-p naalernerani akuersissutigineqarpoq. Ikinnerpaamillu pingasuugaangata marluk piginnittuunissaat tassani akuersissutigineqarpoq.
Akileraartarneq pillugu inatsit nutaaq taassuma saniatigut akuersissutigineqarpoq, aqutsisullu Kalaallit Nunaanni najugaqavinngippata nammineq aningaasaatinut 17 procentiniit 19 procentinut immikkut akileraarusiisarnissaq aamma akuersissutigineqarluni.
Naalakkersuisulli ataatsimeersuarnermut peqataaleruni suliffeqarfiit tikilluaqquniarpai:
- Oqarfigerusuppakka nunatsinnut tikilluaqqusaavusi kisiannili aamma nunatsinni aningaasarsiorneq aammalu nunatsinninngaanniit naleqarnerulersitsineq pilersissagaanni uagut peqatigisassaavugut aammalu suleqatigisassaavugut aningaasallu maani aamma pilersinneqarsimasut uatsinnut aamma iluaqutaanissaat aningaasaliisartut iluaqutissinneqarnissaatullu pingaartigaaq.
