Naalakkersuisuni ullumi ataatsimiinneq: Kuannersuit isumaqatigiinnginnerlu
Naalakkersuisut sapaatip akunneri tamarmik ataatsimiittarput. Ullumikkulli oqallisigineqartussat ilungersunarnerupput.
Kuannersuarnimi aatsitassarsiornissamik suliniut oqallisigineqangaatsiartoq innuttaasunullu ataatsimiititsinissat tallimanngorpat aallartinneqartussat ullumikkut oqallisigineqartussaapput.
AAMMA ATUARUK Demokraatit: Naalakkersuisooqatigiinneq nalilersorneqartariaqarpoq
Ataatsimiinneq nalunaaqutaq qulinut aallartissaaq taannalu akunnernik marlunnik sivisussuseqassangatinneqarpoq.
Kuannersuarni aatsitassarsiorfik pillugu paasissutissat piviusut:
- Kuannersuit Narsap kilometerinik 7,5-inik ungasitsigisumi avannarpasissortaaniippoq.
- Aatsitassarsiorfik asimi 700 meterinik qutsitsigisumiipppoq.
- Greenland Mineralsip aatsitassarsiorfk ukiuni 37-ni piiaaffiginiarpaa.
- Aatsitassarsiorfiup piiaaffigineqarnerani nunaqavissunik 328-nik suliffissaqartitsisoqarsinnaassasoq naatsorsuutigineqarpoq.
- Aatsitassarsiorfik qaqutigoortunik ilaatigut uranimik thoriumimillu saffiugassaqarpoq.
- Aatsitassarsiorfik saffiugassiassamik ukiumut millionit tonsit pingasut missaannik piiaaffiusassaaq.
- Ukiuni 37-ni aatsitassarsiornermit sinnikut 111 millionit tonsiussapput qaarsorlu (qaarsumit piiarneqartumit sinnikut ) 111 millionit tonsiussalluni.
Tusarfik: Pinngortitaleriffik aamma Nationalt Center for Miljø og Energi, IPN-iliaq
.
Siumup innuttaasunut ataatsimiitsiititsinissanik kinguartitserusunnera ippassaq saqqummiunneqarpoq. Tamanna partiip siulittaasuata tulliata, Vivian Motzfeldtip KNR-imut oqaatigaa.
Siulersuisuunerni ataaseq minillugu tassunga isumaqataapput.
Demokraatit tunuarnissamik sioorasaaruteqartut
Siumup siulersuisuuneri nutaat novembarip qaammataani toqqarneqarput – partiillu innuttaasunik ataatsimiititsinissamik unitsitsinissamik nalunaaruteqarnera siusinnerusukkut nalunaarutigineqartup illuatungeraa.
Nunatsinni partiit annerpaartaata taamaalilluni suliniummut unammillissutigingaatsiarsimasaminut alloriarnerujussuusussaq piffissaq kingullerpaaq atorlugu kinguarsarniarpaa.
Tamanna Demokraatit tamanna akuerisinnaanngilaat. Tamanna Demokraatinit aatsitassanut naalakkersuisup, Jens Frederik Nielsenip Sermitsiaq.ag-mut oqaatigaa.
- Ilumoorpoq assut tupappunga Siumup siulersuisortaavisa politikkiminnik allannguinerat pillugu, aamma ilumoorpoq naalakkersuisooqatigiit ingerlaannarsinnaanissaat pillugu, pingaartumik Demokraatinit sukumiisumik nalilersuisariaqaleratta.
Naalakkersuisut siulittaasuata, Kim Kielsenip ”nammineq partiini ilisarisinnaajunnaarlugu” Sermitsiaq.ag-mut oqaatigaa.
AAMMA ATUARUK Immikkut ilisimasalik: Kuannersuit oqallisigineqarneranni Siumumi isumaqatigiinngingaatsiarnerit ersilerput
Ilisimatusarfimmi inuiaqatigiilerinermut ilisimatuup, Rasmus Leanderip suliniut oqallisaangaatsiartoq Siumumi politikkikkut isumaqatigiinngisitsingaatsiarnerarpaa.
- Suliniutaavoq ukiuni qulikkaani kingullerni ingerlasoq. Australiamiut aatsitassarsioqatigiiffiata (Greenland Mineralsip aaqq.) alloriaqqissiinnanissani ajugaasimaarutigileruttoraa Siumup iluani isumaqatigiinngingaatsiartut erserpoq, Rasmus Leander Nielsen oqarpoq.
