Naalakkersuisut danskit tapiissuteqarnerat qujassuteqarfigigaat

Ilaqutariit 66-it angerlarsimaffitsik pigisatillu tamangajammik Karrat Kangerluani juunip 17-ini tassaartoqarmat annaavaat, siunissaalli qaamanerulaalerpoq.

Danskit naalakkersuisui eqqugaasut inissinneqaqqinnissaannut nutaamillu inuuneqalernissaannut 30 millionit koruuninik tapersiipput. Taakku saniatigut Naalakkersuisut tamatumunnga 70 millionit koruuninik immikkoortitsipput.

Naalakkersuisut Qaasuitsullu Kommunia danskit naalakkersuisuisa aningaasatigut tapersiinerat ataatsimut allagaqarlutik qujassuteqarfigaat.

- Danmarkimit tapiissutigineqartoq ilanngullugu 100 mio. kr.-it missaat atorsinnaalissavagut pingaarnerpaatillugu ilaqutariit eqqugaasimasut inissaqartinnissaannut, Naalakkersuisut siulittaasuat, Kim Kielsen, borgmester Ole Dorphilu allapput.

AAMMA ATUARUK Naalakkersuisut innuttaasunik inisseeqqinnissamut 70 millionit aningaasaliissutigigaat

Danskit naalakkersuisui 30 millionit koruuninik tapiissuteqarnermi saniatigut 10 millionit koruunit GEUS-imut immikkoortinnissaat aamma aalajangerpaat, taakkulu nunarput tamakkerlugu qaqqami sisooriatartoqarsinnaaneranut aarlerinartunik misissuinermut atorneqassapput. Tassami Karrat Kangerluanni qaqqap sisoornera nunaqarfinni arlalinni tassaarsuaqarneranut peqqutaassangatinneqarpoq.

Kim Kielsenip taama tapersiissuteqarneq immikkut qujassuteqarfigaa:

- Nuna tamakkerlugu innuttaasut sumunnarfimminni qaqqanit sisoortoqaratarsinnaaneranik immikkut eqqumaffigisassaqarnersut ilisimasallit naliliisinneqarnissaat kissaatigisimavarput. Danmarkimi naalakkersuisut kissaat tamanna malitseqartimmassuk taamalu GEUS-ip misissuisinneqarnissaanut aningaasaliiniarmata nuannaarutigaara, Kim Kielsen oqarpoq.

AAMMA ATUARUK Danmark giver 30 millioner til katastroferamte