Danmark ajunaarnersuarmik eqqugaasunut 30 millionit koruuninik tapiissutigineqartoq

Danskit naalakkersuisuisa Namminersorlutik Oqartussat juunip 17-iani tassaarsuaqarneranik eqqugaasunut inisseeqqinnissaannut ikiorsiinissaannullu 30 millionit koruuninik tapiissuteqarfiginiarpaat. Ministeriuneqarfik taama paasissutissiivoq.

- Tamatta naalagaaffeqatigiippugut. Taamaammat ajunaarnersuaqarnera qanimut malinnaavigaara, Lars Løkke Rasmussen tusagassiuutinut nalunaarummi allappoq.

- Naalagaaffiup tapiissuteqarnera Kalaallit Nunaanni innuttaasunut eqqugaasimasunut toqqissisimasumik sinaakkuteqarsinnaalernissaannut alianartumillu misigisaqarnerannik qaangiinissaannut ikiorsiissutaasinnaanissaat neriuutigaara.

Nunap juunip 17-iani sisoornera annikitsuinnaanngilaq. Inuit inuunerannik naleqarpoq, angerlarsimaffiit, inuussutissarsiornermi tunngaviit nunaqarfinnilu Nuugaatsiami Illorsuarnilu innuttaasut eqqugaapput.

Danskit kalaallillu oqartussaasui upalungaarsimanermik suleqatigiipput.

Namminersorlutik Oqartussat innuttaasut eqqugaasimasut inisseqqinnissaannut 70 millionit koruuninik immikkoortitsipput.

Danskit naalakkersuisuisa 30 millionit koruunit Folketingimut qinnutiginiagai Kalaallit Nunaanni innuttaasunut eqqugaasimasunut nutaamik inuuneqalernissaanut inisseqqinnissaannullu qulakkeeriniarnermut tapersiutaassapput.

Taakku saniatigut Namminersorlutik Oqartussat qaqqap sisoorujussuarnera misissuiffigilluarusuppaat. Danskit naalakkersuisuisa misissuinissamut 10 millionit koruunit immikkoortippai.

- Illersornissaqarfik, politiit GEUS-illu kalaallit oqartussaasui peqatigalugit immikkut ittumik suliniuteqarput tamatumani ataqqeqaakka, Løkke Rasmussen oqarpoq.

Upalungaarsimasut sulinertik pisariaqartitsisoqarnerani kissaatigineqarneranilu ingerlatiinnassagaat ilanngullugu oqaatigaa.

/ritzau/