Naalakkersuisut innuttaasunik inisseeqqinnissamut 70 millionit aningaasaliissutigigaat
Aningaasat inissianik ataavartussanik katiteriaannarnik sanaartornermut, sumiiffimmi inissianik namminerisamik pigineqartunik pisiniarnermut aammalu inissianik pioreersunik, Namminersorlutik Oqartussanit imaluunniit Qaasuitsup Kommunianit pigineqartunik iluarsaassinermut atorneqassapput. Inissianik ataavartussanik sanaartorneq Uummannami nunaqarfiinilu, Upernavimmi, Aasianni, Qeqertarsuarni imaluunniit Qasigiannguiani pisinnaavoq, Naalakkersuisut tusagassiorfinnut nalunaaruteqarlutik taama allapput.
AAMMA ATUARUK Ajunaarnersuaqarnera alianartorujussuuvoq
Inisseeqqinnerlu qimagussorneqartut sumi qanorlu najugaqarusunnerlutik kissaateqarnerat najoqqutaralugu pissaaq. Tamannalu pillugu paasissutissat Qaasuitsup Kommuniata maanna pissarisiarinialeruttorpai.
Kommuninut, Nunaqarfinnut, Isorliunerusunut, Attaveqaqatigiinnermullu Naalakkersuisoq Erik Jensen ima oqarpoq:
- Nuannaarutigeqaara Naalakkersuisut Inatsisartut kiisalu kommunit qanimut suleqatigiilluarnerisigut, innuttaasut Nuugatsiami Illorsuarnilu tassaarsuaqarnerani eqqugaasimasut toqqissisimasumik inuuneqalernissaannut namminnerlu illoqaqqilernissaannut, piaartumik sanaartornissaannut aningaasaliinissat piviusunngormata.
70 millionit koruunit Namminersorlutik Oqartussat sanaartugaannit, atuinikinneruffiullutik naammassineqartunit nuunneqassapput, tassanilu aamma kommunit aningaasanik, 2016-imi aamma 2017-imi Nunaqarfinnut Isorliunerusunullu Inissialiortiternermut Pilersaarummut immikkoortinneqartunik atorneqanngitsunik tapiissuteqassapput.
Tamatumunnga peqatigitillugu Naalakkersuisunit aalajangiunneqarpoq, innuttaasut illunik sanaqataaffiusunik namminerlu illulianik, suli Namminersorlutik Oqartussanut akiitsoqarfiusunik pigisaqartut akiitsui 0 koruuninut appartinneqassasut. Taamaalilluni innuttaasut taakku inuunermik nutaamik aallartitsisinnaalissapput.
AAMMA ATUARUK Indsatshold henter personlige ejendele i Nuugaatsiaq
AAMMA ATUARUK Nuugaatsiaq Illorsuillu ammarnianngilagut