Naalakkersuisoqatigiit 90-kkunni aalisarnermik misissuinissaq aningaasartakilligaat
Ingammik raajarniarneq aaqqissuuteqinniarlugu 1990-imi aalisarneq pillugu inatsisaalersussap suliarineqarnerani pisimasut qulaajarneqassasut 2021-imut aningaasanut inatsisissap suliarinerani partiinit arlalinnit isumaqatigiissutigineqarpoq.
Inatsisartut tamatumunnga 2,5 millionit koruunininik aningaasaliipput.
Taakkuali 1 millionit koruuninik ilanngarnissaannut Inatsisartut aningaasaqarnermut akileraartarnermullu ataatsimiititaliaanni ilaasortat amerlanerussutillit, Siumut pinnani qanittukkkut akuersipput.
- Paasissutissanik imaannaanngitsunik paarinnittoqarpasippoq, taakkulu paasissutissat eqqortuunersut eqqortuunnginnersulluunniit aammalu pasilliutigineqartut eqqortuunersut qulaajaaffigineqartariaqarsorisimavagut, Siumup siulittaasua Erik Jensen, aamma aningaasaqarnermut akileraartarnermullu ataatsimiititaliami siulittaasumut tulliusoq, KNR-imut oqarpoq, nangipporlu:
- Taamanikkut aalisarneq aaqqissuuteqqinneqarmat eqqunngitsumik pineqarsoralutik ataatsimiititalianut partiinullu assigiinngitsunut saqqummiussinikuupput.
AAMMA ATUARUK Aalisarnermut ataatsimiititaliarsuup suliani sinerissami saqqummiutissagaa
Erik Jensenip eqqungitsumik pineqarsorisut tassaanerarpai inuinnaat aammalu Aalisartut Ingerlaqqikkusuttut Peqatigiiffiat. Peqatigiifiup taassuma kissaateqarnera misissuinissamut tunngaviuvoq.
Kisianni sooq 90-kkunni pisunik qulaajaasoqartariaqarnersoq, aalisarnermut naalakkersuisup paasiuminaatsippaa.
- Inussutissarsiortut akornanni suliakkiissutigineqarsinnaavoq pitsaanngitsutut isigineqarsimaguni. Namminneq eqqartuussivimmut tunniussisinnaapput imaluunniit suliassanngortitsisinnaapput, misissuisinnaareerput namminneq, Aqqaluaq B. Egede KNR-imut oqarpoq.
Aningaasaliissutit ilanngarnerisigut 1 millionit koruunit aalisarneq pillugu ataatsimiititaliarsuarmut nuunneqarput.