Aalisarnermut ataatsimiititaliarsuup suliani sinerissami saqqummiutissagaa

Ataatsimiititaliarsuaq sinerissami angalalluni suliaminik ilaatigut saqqummiussisinnaanngorpoq. Ataatsimiititaliarsuup allaatiginninnera juunip naanerani naammassineqartussatut pilersaarutaavoq, kingornalu angalajumaartut naalakkersuisoq oqarpoq.

- Uanga aamma kissaatigigakku namminneq saqqummiussartik isummersornermut periarfissaqartitsillutik ingerlatissagaat, aalisarnermut naalakkersuisoq Aqqaluaq B. Egede KNR-imut oqarpoq.

AAMMA ATUARUK Aalisarnermut ataatsimiititaliarsuaq: Aalisagakinnerulinngikkuni pisassakinnerulissapput

Ataatsimiititaliarsuaq coronap ajornartoortitsinera peqqutaatillugu arlaleriarluni suliaqarnerminnik sivittuisareerpoq. Inatsisissarlu sivitsortumik maanna suliaasoq naalakkersuisup naammasserusulerpaa.

- Suliassat naammassivinneqarnikuusimangillat. Taamaammat inaarsaanissaminnut piffissalerneqarnissartik kissaatigivaat. Naalakkersuisutullu kissaatigisara tassaavoq suliaq taanna naammassipallattariaqartoq, Aqqaluaq B. Egede oqarpoq.

Aningaasaliissutit marloriaatinngortut

Tamanna Inatsisartut aningaasaqarnermut akileraartarnermullu ataatsimiititaliaannit amerlanerussuteqartunit, Siumumiilli isumaqatigineqanngitsumik akuerineqarlutik ilanngarpaat.

Aningaasaliissutinut ilassutit aalisarnermut inatsisip 90-kkunneersup misissuiffigineqarnissaa pillugu ukioq manna aningaasaliisutinit, 1 millionit koruuninik ilanngarnerisigut pissarsiarineqarput.

Aalisarneq pillugu ataatsimiititaliarsuaq ukioq mannamut 1 millionit koruuninik aningaasaliiffigineqareernikuusoq taamaalilluni maanna marloriaammik aningaasaateqalerpoq.