Immikkut ilisimasalik: Naalakkersuisoqarfik inatsimmik malinnittussaavoq

Aalisarnermut Piniarnermullu naalakkersuisoqarfik inatsisit malillugit sinaakkutassanik malinnissimanngippat tamanna unioqqutitsineruvoq aammalu tamat oqartussaanerannik malinninnerunngilaq, Ingerlatsinissamut pisinnaatitaaneq pillugu immikkut ilisimasalik oqarpoq.

Allattoq Karline Platou

marsip 30-at 2023 10:06

- Inuit tamarmik tamat oqartussaatitaanerata aqqani inatsisit qanoq allassimaneri pillugit takunnissinnaatitaallutillu atuarsinnaatitaapput, taamaalillutik inatsisit malerualersinnaassagamikkit, Copenhagen Business Schoolimi Ingerlatsineq pillugu ilisimatooq ilinniartitsisorlu Mark Ørberg KNR-mut oqarpoq.

Tamannarpiarlumiuna pillugu nunatta ombudsmandia Vera Leth, Aalisarnermut Piniarnermullu naalakkersuisoqarfiup inatsisinik najoqqutassaqanngitsumik aalajangiisimanera pillugu aappassaanik isornartorsiuilluni ataasinngormat tusagassiutinut nalunaarummik nassitsisoq

Aamma atuarukOmbudsmandi naalakkersuisoqarfimmut sakkortoorujussuarmik isornartorsiuisoq: Ernumanartuuvoq

Suliami matumani ombudsmandip tikkuagaa unaavoq: Piniarnermut Aalisarnermullu naalakkersuisoqarfik inatsimmik tunngavissaqarani ataatsimoorussamik tikaagullinniarnissamut qinnuteqaatinik itigartitsisimanera, tamannalu inatsimmut maanna atuuttumut nalunaarummullu naapertuutinngilaq.

Suliaq nassuiarneqarpoq

Novembarimi 2022-mi Aalisarnermut Piniarnermullu Naalakkersuisoqarfik ataatsimoorluni piniagassanik tikaagullittassinneqarnissamik qinnuteqaammik itigartitsivoq.

Aalisanermut Piniarnermullu Naalakkersuisoqarfiup itigartitsinerminut tunngavigisaa tassaavoq tikaagullinniarnermi piffissaliussaq patsisigineqarmat, piffissaliussarlu taanna decembarimi 2021-mi naalakkersuisunit aalajangerneqarpoq.

Ombudsmandip misissuineranut tunngatillugu naalakkersuisoqarfik ilisimatitsivoq, naalakkersuisoqarfiup itigartitsilluni aalajangernera inatsisinik atuuttunik tunngavissaqartoq.

Ombudsmandip naalakkersuisoqarfik ilaatigut isornartorsiorpaa inatsiseqartitsinikkut tunngavissanik malinninnginnerarlugu, malittarisassarmi taanna pingaaruteqartuuvoq inuttaasut piginnaatitaaffii illersorneqassappata. Naatsumik oqaatigalugu, inatsiseqartitsinikkut tunngavissamik malinnittussaaneq tassaavoq; oqartussaqarfiit aalajangigaat iliuusaallu tamarmik inatsimmik atuuttussaatitaasumik malittussaatitaanerat, allatut oqaatigalugu, oqartussat nalinginnaq piumasarsorlutik ilioqqusaanngillat, inatsimmilu allassimasut kisimik malinneqartussaatitaasut.

Ombudsmandittaaq Aalisanermut Piniarnermullu naalakkersuisoqarfik isornartorsiorpaa, 2021-mi kukkussutigeriikkami assinganik kukkoqinnerarlugu.

Allisiguk

- Malittareqqusaasuni allassimasoqanngippat, taava naalakkersuisoqarfik iliuuseqassanngilaq. Inatsimmi tunngaviusuaannartussaavoq, nammineerlunilu inatsisiliorluni tunngavissiortoqartussaanngilaq, Mark Ørberg nassuiaavoq.

- Unioqqutitsineruvoq tamallu oqartussaanerat malinneqanngilaq

Ombudsmandilu naapertorlugu, naalakkersuisoqarfik inatsiseqartitsinikkut tunngavissaasumik unioqqutitsivortaaq.

Inatsiseqartitsinikkut tunngavissaqartussaatitaaneq isumaqarpoq, innuttaasut piginnaatitaaffeqarnermikkut illersorneqartussaatitaasut, taamalu oqartussat innuttaasunut nalinginnaliulinnginnissaannik qulakkeerinnittussaasoq.

- Soorunami pingaaruteqarluinnarpoq Inatsiseqartitsinikkut tunngavissaasup malinneqarnissaa. Taannarpiaavormi oqartussat sinaakkutaasussanut malinnikkunnaassagaluarpata pingaarnerpaamik tunngavigineqartussaq, taannalu malinneqanngippat taava tamat oqartussaatitaanerat malinneqarsimassanngilaq. Malinneqarsimanngippallu oqartoqartariaqalissaaq unioqqutitsisoqarsimasoq, Mark Ørberg oqarpoq.

Aamma atuaruk KNAPK naalakkersuisoqarfiup isornartorsiorneqarneranut isumaqataavoq - Tatiginninnerput tassunga killeqarpoq!

Inatsit najoqqutaralugu iliuuseqartoqartussaavoq

Taanna aamma nassuiaavoq, naalakkersuisoqarfik nalunaarusiamik nutaamik atuutitsisariaqartoq.

Mannalu tikillugu naalakkersuisoqarfik inatsimmik tunngavissaasumik pisariaqartinneqartumillu suli peqanngilaq.

- Alloriarneq siulleq qaangiinnarneqarsinnaanngilaq. Maleruaqqusaasut inisseqqaartinnagit aalajangersaalluni aallartittoqarsinnaanngilaq, taanna oqarpoq nangillunilu:

- Naalakkersuisoqarfiup inatsimmik najoqqutassamik naammattumik atugassaqannginnini maluginiarsimanngippagu, taava atorfilittaasut pisussaaffigaat nutaamik maleruagassaliornissartik taamaaliornikkummi aatsaat inatsisitigut akuerisaasumik aalajangiisoqarsinnaalissaaq. Inatsisimmi unioqqutiitigalugit ingerlasoqarsinnaanngilaq.

Taamaammat Mark Ørberg isumaqarpoq, ombudsmandip isornartorsiuinera attanneqarsinnaassappat naalakkersuisoqarfik nutaamik nalunaarusiortariaqartoq.

KNR-p naalakkersuisoqarfik oqaaseqartinniarlugu ilungersoraluarpoq piffisarititaasorli tikillugu uterfiginnittoqarani.