Naalakkersuisup sukkanerusumik akiuussusersuinissaq kissaatigigaluaraa
Nunatsinni covid-19-mut akiuussutissamik kapuuinerit jannuaarip qaammataani aallartimmatali, nunatsinni innuttaasuini naammassillutik akiuussuserneqartut manna 15 procentingajaapput.
Tamannalu arriippallaartoq partiit illuatungiliuttut Siumut Demokraatillu, taavalu partii naalakkersuisoqatigiinnut ikorfartortaasoq, Atassut, isumaqarput. Taakkua Naalakkersuisut sapaatit akunnerata siuliani isornartorsiorpaat.
Aammali peqqissutsimut naalakkersuisup, Kirsten L. Fenckerip(N), sukkanerusumik akiuussusersuisinnaanissaq kissaatigigaluarpaa.
- Soorunalimi kissaatiginarpoq sukkanerusumik ingerlasinnaasoq. Kisianni pissutsit taamaapput, Kirsten L. Fencker oqarpoq.
AAMMA ATUARUK Illuatungiliuttut: Akiuussusiinerit arriippallaarput
Partiit pingasut sukkanerusumik akiuussusersuinissamut iliuuseqarnissaq kissaatigaat.
Nunatsinni innuttaasut akiuussutissanik atorneqarnissamut akuerisaasunit allanik kapitinnissartik aalajangersinnaasariaqaraat Atassummit isumaqarput.
Pfizer-BioNTechimit Modernamiillu akiuussutissat Nunatsinni atorneqarsinnaasutut maanna akuerisaasuupput.
Danmarkimi innuttaasut Johnson & Johnsonimit Astra Zenecamiillu akiuussutissamik kapitinnissaminnik aalajangersinnaapput. Nunatsinnilu taama aalajangertoqarsinnaasariaqartoq Atassut isumaqarpoq.
AAMMA ATUARUK Akiuussutissalersuinermut pilersaarut sivitsoqqinneqartoq
Tamannali kissaatiginagu, peqqissutsimut naalakkersuisoq oqarpoq.
- Astracenica Johnson & Johnsonilu nunatsinni atuutsilernissaanik kissaateqanngilagut. Maannamut takuneqarnikuupput taakku akiuussutissat kingunipilui sakkortugamik. Aanaartoornerit assigiinngitsut nunatsinni katsorsarneqarsinnaanngitsut piusinnaammata.
Akiuussutissanik amerlanerusunik pissarsiniarnissamut nunanik allanik isumaqatigiinniarnerit pimoorunneqarnerunissaat Demokraatit kissaatigaat. Tamannali sulissutigineqalereersoq Kirsten L. Fencker oqarpoq.
- Isumassarsiatsialaavoq, aamma soorunalimi ujartuivugut kikkunnit allaniit pisinnaanersugut. Amerikarmiut aperereerpagut nunanut allanut naalakkersuisuat maaniimmat aperineqarpoq. Taakkua allaffissornikkut suliat amerikami aamma apeqqutaallutik qaqugu akissutisisinnaanersugut utaqqimaarparput
AAMMA ATUARUK Broberg: Blinkenip tikeraarnera kalaallit iluaqutigissavaat
Akiuussutissanilli amerlanerusunik pissarsiniarneq ajornakusoorpoq.
- Nunarsuaq tamakkerlugu piumaneqarput. Taamaattumik tunuleriiaattuni akornganiippugut.
Peqqissutsimut naalakkersuisoq, Kirsten L. Fencker taama oqarpoq.
Nunatsinni innuttaasut kapitissinnaasut tamarmik Covid-19-mut akiuussutissamik septembarip aallaqqaataata missaani kapitereersimanissaat naatsorsuutigineqarpoq.
