Broberg: Blinkenip tikeraarnera kalaallit iluaqutigissavaat
Amerikamiut nunanut allanut ministeriat, Antony Blinken, Kalaallit Nunaannut ippassaq tikeraarmat Issittup ineriartortinnissaanut eqqartugassat arlaqarput.
- Arlaqarput. Taamaattorli kalaallinut ulluinnarni iluaqutaasinnaanisaanik suleqatiserinninnissamik saqqummiussinissaq eqqartukkani pingaarnersaavoq. Nioqqutissanik akikinnerusunik pitsaanerusunillu qularnaarinninnissaq eqqartorparput, Inuussutissarsiornermut, Niuernermut, Nunanut Allanut Silallu Pissusaata Allanngoriartorneranut Naalakkersuisoq, Pele Broberg oqarpoq.
Amerikamiut nunanut allanut tunngasunut ministeriat Kangerlussuarmut akunnerni tallimani ippassaq tikeraarpoq.
Taassuma Pele Broberg, Múte B. Egede aamma danskit nunanut allanut tunngasunut ministeriat Jeppe Kofod peqatigalugu Sermersuaq qulimiguulimmik angalaarpaat Black Ridgemukarlutillu.
Tikeraarnera tusagassiortunik katersortitsinermik naggaserneqarpoq.
Blinken Reykjavikimi Issittumi Siunnersoqatigiit ataatsimiinnerani peqataareerluni tikippoq.
Taanna ataasinngormat Københavnimiippoq, tassanilu Pele Broberg ilaatigut aamma ataatsimeeqatigalugu.
- Covid-19-mut akiuussutissanik pissarsinissaq eqqartorparput, takornariaqarnermut suliaqarsinnaanissaq sukkanerusumik aallartissinnaanissaanut qulakkeerinninniarluta.
Oqarputit Amerikap Danmarkillu paasisariaqaraat Kalaallit Nunaat Danmarkiunanilu Savalimmiuunngitsoq. Qanoq tamanna qisuariarfigineqarpa?
- Ajunngitsumik qisuariarfigineqarpoq. Uagut kinaassuserput ajunngitsumik qisuariarfigineqarpoq. Nunarsuarmioqataalluta aalajangigassanik tulluusimaarluta eqqartueqataasinnaagatta. Uagut kissaaterput malillugu suleqateqarusunnerput tassani ersersinneqarmat - anngaaginartutut inissisimanata, kisiannili nammineerluta assagut isaallugit suleqatiserinnikkusukkatta, Pele Broberg oqarpoq.
AAMMA ATUARUK Múte B. Egedep Blinkenimut oqarnera: Nunarput pillugu avaqqunneqartassanngilagut
Suleqatigiinnerunissaq eqqartorneqarpoq. Tamanna Kalaallit Nunaannut qanoq kinguneqassava?
- Siusinnerusukkut eqqartorneqareerpoq. Suliffeqarfiit akikinnerusunik nioqqutissanik pissarsisinnaanissaat qulakkeersinnaanngilarput, suliffeqarfiillu nioqqutissiorfinnik allanik ujaarlissasut piumasaqarfigisinnaannagit. Nioqqutissiorfiilli suleqatikkuminarnerulersinnissaanut aqqutissiuusisinnaavugut, assersuutigalugu assartuinissamut aqqutissat eqqarsaatigalugit. Kalaallit Nunaanni najugaqaruit Amerikamut niuersinnaajuaannarneq ajorputit, akerlianili Danmark aqqutigeqqaartinnagu Amerikamut aalisakkanik tunisaqarsinnaanat. Taamaammat akornutit taamaattut, inatsisitigut niuernikkullu isumaqatigiissutit aqqutigalugit, ulluni qaninnerni atorunnaarsinneqartariaqartut naatsorsuutigaara, Pele Broberg oqarpoq.
Ippassaq sisamanngornermi Pele Brobergip Antony Blinken pingajussaanik naapippaa. Københavnimi Reykjavikkimilu Issittumi Isumasioqatigiittoqarmat sapaatit-akunnerata aallartinnerani aamma naapipput.
Biden januaarip 20-ani præsidentinngormalli Antony Blikenimit nunarsuarmi Kalaallit Nunaat tikeraarneqartut qulingiluassaraat.