Akiuussutissalersuinermut pilersaarut sivitsoqqinneqartoq

Danskit tamarmiullutik Coronavirusimut akiuussusserneqarnissartik, aatsaat septembarimi naatsorsuutigisinnaassavaat.

Taama nutaarsiassaqartitsiviit arlaliusut, soorlu TV2, Ekstra Bladet kiisalu Ritzau tusagaqarput.

Ullut akiuussutissiiffiusussat sapaatip akunnerinik marlunnik sipporneqarput.

Pilersaarutit malillugit juunimi 20-niit 29-it tungaanut ukiullit akiuussutissamik kapineqarnissamut neqeroorfigineqarumaarput, taakkunanngattaaq ilaapput 35-iniit 44-it tungaanut ukiullit.

Innuttaasut 30-iniit 34-it tungaanut ukiullit juulimi kingulliullutik akiuussutissalerneqarnissaminnut aggersarneqarumaarput.

Ritzaup paasissutissiinera malillugu kinguartitsineq Qallunaat Nunaanni akiuussutissat juunimi juulimilu tikittussat maanna naatsorsuutigisamiit 1,1 milliuuniniit ikinnerusut naatsorsuutigineqarnerat peqqutaavoq.

Pilersaarutit malillugit qaammatini taakkunani akiuussutissat 4,2 milliuunit tikissasut naatsorsuutigineqarpoq. Tassalu sisamararterutaanik ikinnerujumaarput.

Aviisip Ekstra Bladetip allaaserisaani allassimavoq, akiuussutissat Modernaminngaanneersut ikinnerunissai naatsorsuutigineqarnerat pissutaasoq, taavalu aamma akiuussutissap CureVacip akuerineqarnissaa kinguarmat.

TV2-p tusarpaa, Danmarkimi Peqqissutsimut Aqutsisoqarfiup akiuussutissaq Johnson & Johnsoniminngaanneersoq atorniarnagu aaliangersimasaa, danskit naalakkersuisuisa eqqarsaatigeqqequlersimagaat.

Aanaartuulaartarnernik ersiuteqartarsimanerata kingorna akiuussutissaq taanna akiuussusersiuilluni pilersaarutiniit atorumajunnaarneqarsimavoq.

Kingornali danskinit qinerneqarsinnaangorlugu aaqqiisoqarpoq.

Atorneqartinnaguli nakorsamik oqaloqateqaqqaarnissaq piumasaqaataavoq.

TV2p nutaarsiassiinera malillugu, eqqarsaatiginneqqusineq pissuteqarsimavoq akiuussutissalersuinermut pilersaarummi kinguartitsisimaneq.

Qallunaat Nunaanni minnerpaamik katillugit 2,1 milliuunit covid-19-imut kapitereernikuupput. Tassa imaappoq inuttaasut 36,4 procentii akiuussusersorneqareersimallutik.

1,3 milliuunit, tassa procentinngorlugu 21,4 procentii aappassaanik kapitereersimapput.