Illuatungiliuttut: Akiuussusiinerit arriippallaarput

Nunarput ukiup affaata missaani matoqqareerluni maajip ulluisa pingajuanni ammarpoq.

Nuummili coronavirusimik tunillatsittoqarsimanerata sisamanngornermi maajip ulluisa 27-anni paasineqarnerata kingorna illoqarfimmi killilersuinerit sukannersut erngertumik atuutilerput.

Tunillatsissimasoq sapaatit akunnerata siuliani neriniartarfimmiillunilu imerniartarfimmiissimavoq inuiaqatigiinnilu tunillaassuuttoqarsinnaaneranik aarlerisoqarpoq, taamaammallu innuttaasunik 50-ileereersimasunik nukingertumik akiuussusiisoqalerluni.

AAMMA ATUARUK Tunillatsissimasumik allamik Nuummi uppernarsaasoqaqqittoq - 80-it tikillugit aqagu misissortissasut

Taamaakkaluartorli nunatsinni akiuussusiinerit arriippallaartut Demokraatit Atassullu isumaqarput. 

- Ajoraluartumik nunatsinni taama arriitsiginera ajuusaarnarpoq, Atassutip siulittaasua Aqqalu Jerimiassen oqarpoq.  

Demokraatillu isumaqataapput. Nunattami ammariartoqqinnera Demokraatit peqqinnartuusoraa, akiuussusersuinerilli sukkanerusariaqarsoraat.

- Piffissaq sukkanerpaaq atorlugu akiuussusersuinerup ingerlanneqarnissaa kissaatigigaluarparput, Anna Wangenheim (D) oqarpoq. Taanna februaarimi peqqissutsimut naalakkersuisutut tunuarpoq.  

Sukkanerusumillu akiuussusiisoqassappat nunanit allanit akiuussutissanik pissarsiniarluni isumaqatiginninniarnerit Demokraatinit aallunneqartariaqarsorineqarpoq.

AAMMA ATUARUK Herefordimi, Skylinemi Daddysimiluunnit arfininngormat isersimavit? Taava coronamut misissortissaatit

Nunatsinni partiini illuatungiliuttut annersaanni naammagisimaarinninnginneq aamma takussaavoq. Ilumut nunatta innuttaasuisa amerlanerpaartai suli akiuussutissamik kapitinneqanngitsut nunatta ammariartornera tulluartuunersoq, Siumumit eqqarsaatigilluaqqaarneqarsinnaanerarpaa.

- Tunillatsissimasumik takkuttoqariasaarmat aatsaat sukkasuumik akiuussusiineq aallartippoq. Eqqarsarluarnerulaartoqarsimasinnaagaluartoq uagut kissatigivarput, Jess Svane oqarpoq.

Nunatsinni akiuussutissat Modernameersut aamma Pfizerimeersut atorneqarnikuupput.

Danmarkimi akiuussutissamik Astrazenecameersumik Johnsen & Johnsonimeersumilluunniit kapitikkusunnerlutik inuit namminneq aamma aalajangersinnaavaat. Nunatsinni akiuussutissanik sorlernik kapitissinnaanissamik inuup nammineq aalajangiisalernissaa Atassutip kissaatigigaluarpaa.

- Neriuutiginaannartaraluarpoq Danmarkimi maanna atuutsinneqartoq frivilligordningi nunatsinnut aamma eqqunneqarnissaa, Aqqalu Jerimiassen oqarpoq.

Nunatsinni covid-19-imut akiuussutissamik tamakkiisumik kapitissimasut maanna 15 procentingajaapput.