Tunillatsissimasumik allamik Nuummi uppernarsaasoqaqqittoq - 80-it tikillugit aqagu misissortissasut
Tunillatsissimasumik nutaamik Nuummi uppernarsaasoqaqqippoq. Nakorsaanerup oqarnera naapertorlugu tunillatsissimasoq tunillatsissimasut allat marluk suleqatigai.
Sermitsiaq.ag taama allaaserisaqarpoq, nakorsaanerullu tamanna KNR-imut uppernarsarpaa.
Akuliusimanaveersaarneq misissorteqqinnerlu
Naalakkersuisut nunatsinnut tikittut tikinnerminnit ullut tallimat qaangiunneranni misissorteqqittarnissaannut malittarisassat atuutilerseqqinnikuuaat.
Akuliusimanaveersaarninni pisuttuarsinnaavutit aamma najugaqatigisannut qanillisinnaavutit.
Niuerniarsinnaavutit.
Allanut pulaassanngilatit, pulaartoqassanngilatit, bussissanngilatit, taxassanngilatit suliartussanallu.
Nunatsinnut tikinnermi ullut tallimat qaangiunneranni misissorteqqissaatit. Misissortinnerup tunillatsissimannginneq uppernarsarpagu suliartoqqissinnaavutit nalinginnaasumillu inuunerit ingerlateqqissinnaallugu.
Misissorteqqinnianngikkuit ulluni 14-ini akuliusimanaveersaassaatit aatsaallu ersiuteqanngikkuit suliartoqqillutit..
- Inuit marluk tunillatsissimasutut pingasunngornermi uppernarsarneqarsimasut suleqataat tunillatsissimasoq sisamanngornermi uppernarsarparput. Tunillatsissimasutulli uppernarsarneqartoq tunillatsissimasunut allanut qanillisimagunanngilaq, nakorsaaneq, Henrik L. Hansen Sermitsiaq.ag-mut oqarpoq.
KNR-imut itisiliivoq:
- Tunillatsissimasutut uppernarsarneqartoq kingulleq tunillatsissimasutut uppernarsarneqarsimasunit allanit marlunnit tunillatsissimasinnaanngilaq. Taamaamma Nuummi inuiaqatigiit akornanni tunillaassuuttoqarnissaa aarlerinarsinnaavoq, tamannalu ernumassutigaarput.
Nakorsaanerup oqarnera naapertorlugu tunillatsissimasutut uppernarsarneqarsimasut tamarmik illoqarfimmi suliffimmi ataatsimi sulisuupput. Suliffeqarfik angisuujuvoq, sulisullu 80-it tikillugit angerlarsimaannaqquneqarput.
Aqagu tallimanngornermi ullaakkut arfineq pingasunut sulisut 80-it tikillugit amerlatigisut misissortinnerat aallartinneqassaaq.
AAMMA ATUARUK Nuummi inuit marluk coronavirusimik tunillatsissimasut
Tunillaasimasinnaasumik ujartuineq aamma aallartinneqarpoq.
Naalli inuiaqatigiinni tunillaassuuttoqarsinnaagaluartoq nakorsaaneq eqqissisaavoq:
- Ukiup ataatsip matuma siornanit pissutsit allaanerupput. Aarlerinarnerpaamiittut akiuussutissamik kapitinnikuupput, nakorsaaneq oqarpoq.
PIffissami matumani killilersuinerit takkuttoqangajalinngilaq. Tamattali ungasillisimaarnissamik eqqaamanninnissamut akisussaaffeqarpugut:
- Ukiup ataatsip affaatalu ingerlanerani oqaluuserisimasagut puiorneqalersimasulli atoqqinneqalissapput, Henrik L. Hansen oqarpoq.
- Imminut ungasillisimaartoqarneratigut tunillatsinnissaq aarlerinanngilaq.
Tunillatsissimasunik marlunnik nutaanik Nuummi pingasunngornermi uppernarsaasoqarpoq. Nakorsaanerup oqarnera naapertorlugu ullumi sisamanngornermi tunillatsissimasutut uppernarsarneqartoq taakkununnga marlunnut qanillisimanngilaq. Taakkumi marluk tikinnerminnit angerlarsimaannarsimapput.
Tunillatsissimasut taakku marluk Danmarkimit nunatsinnukarsimasuupput. Taakkulu marluk tikinnerminnit ullut tallimassaanni tassa marlunngormat unnukkut misissortinnerisa kingorna tunillatsissimasut paasineqarput.